Nikkelruvkki suovva givssida

Nikkelis Ruošša bealde illá vulget olggos dáluin, go nikkelruvkkis borggista nu suhkkes suovva.

 

 Ruošša bealde Nikkel-gávpogis, Norgga rájá láhka, ballet olbmot iežaset dearvvašvuođas.

Guovllus lea maŋimus beivviid leamaš suhkkes suovva, man leat mearkkašan maiddái Norgga beal rájá.

Suova dihte lea leamaš hui lossat vuoigŋat, muitala nikkellaš Olga Torubajova telefongeažis Nikkelis.

 

- Gitta lásaid duohken 

- Suhkkes suovva lea stuorra váttisvuohta ja leamaš jo muhtun áiggi. Mii geahččalit orrut siste ja doallat lásaid gitta, muitala Torubajova Nrk:ii.

Ruoššabeali Nikkel gávpogis leat 16 000 ássi. Báiki lea rádjaguovllus, ja dohko dárppašuvvo sierralohpi jus hálideaš fitnat ja deaivvadit doppe olbmuiguin.

- Ahkidis dilli

Dárogielhálli Irina Neganova, gii dál lea Nikkelis, govvida dili ahkidin.

- Mii eai oaččo mángelágan virggálaš dieđu, muhto márkanis lohket suovvan dasgo sulfurfábrihkká (suomagillii rikki) lea gitta. Buohkat dihtet dan, go buohkat dán gávpogis han barget nikkelrusttegis.

- Fábrihkká ii buhtis

Sulfurfabrihkká lea gitta, muhto jotket ain nikkelmalmma suddademiin, buhttiskeahttá. Danin lea guovlu suovvan, lohká Neganova.

Neganova mielde ii leat nuoskkideapmi leamaš ná vearrái mángga jahkái. - Biegga bossu čađat gávpoga guvlui. Gávpogis lea suhkkes alitlágan suovva ja lea lossat vuoignat. Olbmot gosset ja bartidit allergiijaiguin, lohká Neganova.

Svanhovd birasguovddážis Čoalbmejávrris (Svanvik) Mátta-Várjjagis bearráigehččet Nikel guovllu birrasa. Ikte ii lean sis mihkkige dieđuid mainna duođaštit Nikela nuoskkidanváttisvuođa.

Norilsk-Nikel -málbmafitnodat, dat jođiha nikkelrusttega. Ikte álmmuhii fitnodat stáhtalaš tv kanála GTRK Murmansk bokte, ahte leat sáddemin áššis preassadieđáhusa.

Nikkellaččat goittotge ballet dearvvašvuođaset bealis.

Go jo arvesuojitge ráigánit olgun, maid de dahká áibmu sin geahppagiidda, jearrá Neganova.

sŧnc