Ihttin duorastaga geassemánu nuppi beaivvi lágida Sámediggi vuosttaš čoahkkima Norgga oaivetgávpogis, Oslos, gos lea sáhka ruvkedoaimma servodatekonomalaš váikkuhusain. Sámedikki dievasčoahkkima oktavuođas, geassemánu guđat beaivvi, lágiduvvo čoahkkin dán fáttá birra Kárášjogas. Dán dadjá Silje Karine Muotka, ja lasiha ahte čoahkkin lea rabas buohkaide geain leat dáhttu ja beroštupmi.
Logaldallamat
Vista analyse beaivválaš jođiheaddji, Ingeborg Rasmussen, ovdanbuktá raportta Riehppovuona ruvkeplánaid servodatekonomalaš váikkuhusaid birra, ja Oslo Universiteahta professor Geir Ulfstein, ges ságastallá álbmotrievttálaš rámmaid birra sámi guovlluide areálasisabahkkemiin.
Áhpedutkaninstituhta dutki, Jan Helge Fosså, ges ságastallá das makkár váikkuhusat ruvkedoaimmas leat meara ekovuogádahkii.
Digaštallan
Maŋŋil sáhkavuoruid lea ráddjejuvvon sadji digastallamii, dán fáttá birra. Digastallanoasi jođiha Burson-Marsteller medie-ossodaga seniorráđđeaddi, Håvard Kleppa. Digaštallanoasis jerrojuvvo mii lea Riehpovuona boahtteáigi.