Hopp til innhold

– Mii fertet juoidá bargat

Ruošša álgoálbmotorganisašuvdna RAIPON ii áiggo vuollánit vaikko Ruošša eiseváldit leat mearridan bissehit sin doaimmaid. Otne ovddidit ášši Árktalaš ráđis.

Rodion Sulyandziga, avdelingsleder i RAIPON

RAIPON ossodatjođiheaddji Radion Sulyandziga lohká ahte sii áigot ovddidit ášši Ruošša eiseváldiide farggamusat.

Foto: Jonas Sjøkvist Karlsbakk / Barentssekretariatet

Árktalas ráđi čoahkkimis otne Haparandas, davvi-Ruoŧas, ovddidit Ruošša álgoálbmogiid oktasassearvi RAIPON cealkámuša mas čilgejuvvo movt Ruošša eiseváldit leat njulgestaga áitán sin doaimmaid.

– Mun jáhkán ahte dát livččii stuora veahkkin midjiide ja dát lea dehálašm dadjá RAIPON ossodatjođiheaddji Radion Sulyandziga.

Navdet rihkkume lága

Ruošša justisminister lea mearridan ahte RAIPON doaimmat galget bissehuvvot danin go oaivvildit sin rihkkume Ruošša lága.

Organisašuvdna lea máŋgii geahččalan rievdadit njuolggadusaid, muhto dát ii leat ávkkuhan. RAIPON ossodatjođiheaddji jáhkká ahte politihka dihte leat mearridan bissehit sin barggu.

– Lei oanehis, muhto čielga diehtu mii bođii departemeanttas ahte organisašuvdna galgá heaittihuvvot, dadjá Sulyandziga NRKii.

Fertejit leat várrogasat

– Mun jáhkán ahte mii fertet leat várroagasat ja eat sáhte panihkas juoidá bargat. Mii eat sáhte lágidit almmolaš čoahkkimiid dahje miellačájáhusaid dán birra, muhto dat ii mearkkaš ahte mii vuollánit, dadjá son.

Organisašuvdna áigu Ruošša álgoálbmogiid ovddas sáddet reivve sihke presidenttii ja stáhtaministarii mas bivdet eiseváldiid jorgalit áššis.

– Mis leat guokte vejolašvuođa, juogo diktet RAIPON joatkit dahje ahte oalát hávkadit RAIPON organisašuvnna dadjá Sulyandziga NRKii.

Korte nyheter

  • Ođđa sámediggeválggaid ferte lágidit maŋimustá geassit

    Sámedikki ságadoalli Pirita Näkkäläjärvi ii sáhte vel dadjat, maid ođđa válggaid lágideapmi johtilis áigetávvaliin mearkkaša, dieđiha Yle Sápmi.

    Alimus hálddahusriekti (AHR) dagai historjjálaš mearrádusa, go mearridii vuosttaš geardde, ahte Suoma sámediggeválggaid galgá lágidit ođđasit.

    Ođđa válggaid galggašii sámediggelága mielde lágidit guovtte olles mánu geažes das, go válggaid gomiheames lea mearriduvvon.

    AHR presideanta Kari Kuusiniemi dulkojumi mielde ođđa válggaid galgá lágidit geassemánu loahpa rádjai.

    Pirita Näkkäläjärvi
    Foto: Ođđasat / Yle Sápmi
  • Eai beasa gieldda gohčodit Pajalan kunta

    Ruoŧa ráđđehus hilgu Pajala gieldda ohcamuša geavahit meänkieli nama «Pajalan kunta» gieldda bálddalas namman, čállá Fria Tider áviisa.

    Ráđđehus mieđiha, ahte lea vuogas čalmmustahttit veahádagaid ja nannet veahádatgielaid.

    Almmatge deattuha ráđđehus, ahte ii ovttage gielddas Ruoŧas leat eambbogo okta almmolaš namma. Sii livčče spiehkastan dás jus livčče dohkkehan ohcamuša.

    Fertešii lágaid rievdadit jus galggašii sáhttit gielddaide dohkkehit eambbogo ovtta nama.

    Meänkieli
    Foto: Svenske Tornedalingers Riksforbund – Tornionlaaksolaiset
  • Gielddaluohti bohciidahttá digáštallama

    Gáivuona gielddastivra evttoha dohkkehit sierra luođi gielddaluohtin. Dát ii oro buohkaid mielas nu buorre jurdda, go sin oaivila mielde ii leat Gáivuonas iežas juoiganárbevierru.

    – Mun in leat luođi vuostá. Luohti lea juoga mii gulai ja ain gullá boazodoalliide ja sámiide geain dát lea oassi iežaset kultuvrras, čilge gáivuotnalaš Levin Mikkelsen.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    Guovddášbellodaga gielddastivrraáirras Svein Oddvar Leiros dat evttohii, ahte Gáivuonas galggašii leat gielddaluohti. Son ii leat ovttaoaivilis Levin Mikkelsen čilgehusain.

    – Min gielddas lei dáruiduhttin dievaslaš. Dákkár oaivilat gullet dan áigái. Su suokkardallan čájeha, ahte Gáivuonas juigojuvvui. Nu ahte ii leat duohta ahte Gáivuonas ii leat juigojuvvon, lohká Leiros.

    Herman Rundberg ja su joavku Manne dat leat ráhkadan dán luođi.

    – Luođi mihttomearri ii lean suhttadit olbmuid, muhto digáštallan lea bures boahtin, árvala Rundberg.

    Gáivuona gielddastivra ávžžuha sidjiide ovddidit máhcahemiid gielddaluođi birra. Áigemearri lea dán mánu maŋimuš beaivve.