Romssa politiijaguovllus leat guorahallagoahtán veagalváldima, mii soaitá leat dáhpáhuvvan Sis-Finnmárkkus. Dan duođašta áššáskuhttinfágalaš dutkanjođiheaddji Gøril Lund NRK:i.
– Dasa, gean dán áššis váruhit dahkan vearredagu, ii leat nammaduvvon bealušteaddji, dieđiha Lund.
Stáhtaadvokáhta Tor Børge Nordmo dadjá NRK:i ahte leat nammadan Romssa politiijaguovllu gieđahallat ášši, bealátkeahtesvuođa geažil.
– Romssa politiijaguovllus vuoruhit ášši, deattuha Gøril Lund.
Politiijat eai háliit muitalit duođi eambbo ášši birra, danne go leat dutkamin ášši ja maiddái áššái gullevaččaid agi dihtii.
Gieldda čuovvula ášši
Suohkana sátnejođiheaddji muitala ahte meannudit dáhpáhusa duođalaččat, ja ahte leat ásahan heahtedustenjoavkku mii veahkeha sin geaidda ášši guoská.
– Dát lea politiijaášši, ja dan fertejit sii maid čuovvulit. Mii fertet suohkanis duođalažžan váldit dán ja vuosttažettiin dan oažžut ovdan ahte dákkár dáhpáhusat eai leat dohkálaččat eai mainna ge lágiin, deattuha suohkana sátnejođiheaddji.
Suohkanis lohket áigut čuovvulit ášši.
– Mii fertet guhkit áigge bargat eastadit dakkár diŋggaid, dát ii leat diekkár maid mii ihttážii nagodit čoavdit mainnage lágiin, lohká sátnejođiheaddji.