Urørt lea neahttasiidu gosa buohkat sáhttet bidjat musihkaset ja NRK dat lea dan duogábealde. Rotaaimo lea čieža lávlaga bidjan dán siidu. Siiddus čuožžu ahte joavku lea Guovdageainnus eret.
Imašlaš teavsttat
Rotaaimoi gullet golbma olbmo geat geavahit dáid namaid; Biro-Ante (lávlu), Varra-Erke (synth) ja Bávččas-Biera (gitára) ja joavkku leat imašlaš teavsttat mat leat čállon heajos sámegillii. Teavsttat leat dan muttos roavvát, ahte mii Árdna neahttasiiddus eat hálit daid dása čállit.
Guhta guhta guhta 666- lávlagis joavku lávlu, ahte hálidit goddit sámenieiddaid ja hálidit suoskat "vuolledábiid" (doaimm. lea láivodan sáni). Rotaaimos lea maid lávlla man namma lea "Mánnodávddat". Dás lávlu Biro-Ante ahte son hálida borrat sámenieiddaid ja juhkat mánnodávddaid.
Pedofiliija cuvccas
Joavkkus lea maid ođassiidu gos čállet, ahte Varra-Erke lea váidojuvvon go 12 jahkásaš kárášjohkalaš sámenieiddažis lea suoládan 666,66 lihttera mánnodávdavara nieidda vuolledábiin. Dát galgá leat dáhpáhuvvan diimmá mánnodávdariemuin Deanus.
Seammás lea Rotaaimos almmuhus gos ohcet nieiddaid (miellaseapmosit sámenieiddaid) vai sis sáhtášedje váldit mánnodávdavara Varra-Erkke riegádanbeaivve oktavuođas, mii lea golggotmánu 31. beaivve.
Atná unohassan
Olbmot Guovdageainnu musihkkabirrasis geaiguin Árdna ikte lea ságastallan eai sáhte dahje hálit muitalit geat dán jovkui gullet. Nuorra čuojaheaddji duođaštii, ahte gilis lea joavku man namma lea Rotaaimo, muhto son ii loga diehtit geat sii leat, iige son hálidan addit jearahallama dán birra.
Guovdageainnu musihkkáriid searvvi jođiheaddji, Kirsten Marit Olsen, almmatge atná dán ášši unohassan. Erenoamážit orro su mielas boastut pedofiliijain leaikkastallat go diehtá makkár losses áiggi báiki vásihii diibmá go ledje nu olu dákkár rohcošanáššit. - Nuorat jullot leaikkastallat, muhto ii dákkár áššiiguin, lohká Olsen. Son gáibida ahte NRK farggamusat jávkadivččii dáid dieđuid.
