Rihkkon buori preassavieru
Steinkjer-Avisa rihkkui buori preassavieru, go almmuhedje artihkkala mii sámiid merke dihtoláganin. Dan cealká PFU. Dan čállá Ságat-áviisa. Steinkjer-Avisa lei almmuhan dán artihkkala nehttii cuoŋománus dán jagi. Bajilčálan lei "Samer ypper til bråk". Artihkkalis moaitiba bartaeaiggát ja suohkana meahccehoavda boazosámi, go son lea ceggen áiddi lobi haga, guvlui gos olu olbmot vánddardit. Artihkkalis čuoččuhuvvui ahte "sámit leat billistan luonddu" ja ahte "sámit dahket justte nu movt alcceseaset heive".