NRK Meny
Normal

Mánát lea Riddu Riđđu váimmus

Riddu Riđđu mánáidfestivala lágiduvvo 20. gearddi. 120 máná besset golbma beaivvi vásihit iešguđege doaimmaid.

Barnefestivalen på Riddu riddu er igang.

Signe Johnsen Birkeland veahkeha mánáid hábmet ođđabeairuohta stálloháma. Muđui leat olu doaimmat mánáide festiválas.

Lea 20 jagi dassái go vuohččan lágiduvvui Riddu Riđđu mánáidfestivála. Dát lea šaddan bivnnuheabbo ja bivnnuheabbo jagis jahkái.

Goikeguolli

Mo goikeguoli ráhkada sáhttá oahppat Riddu Riđđu festiválas. Dá sámediggeráđđi Henrik Olsen muitaleamin mánáide mo guoli čatná ovdal heŋge goikat.

Foto: Klemet Anders Sara / NRK-Sápmi

Mánáidfestivála álggaha olles festivála

Dán jagi Riddu Riđđu festivála lágiduvvo 25. gearddi, ja mánáidfestivála ges 20. gearddi. Mánáidfestivála álggaha olles festivála odne unna lávddážis Goržži guolbanis. 100 máná ledje lávddis go festivála rahppui odne 11-aiggi unna lávddážis. Mánáidfestivála rabai festivála jođiheaddji Karoline Trollvik.

Sara Marielle Gaup Beaska rohttesii mánáide moadde luođi. Mánát ohppe maid "njoammiluođi" sus. Festivála jođiheaddji Karoline Trollvik lohká mánáidfestivála guovddážis ja váibmun olles festiválas.

– Mánáidfestivála álggahuvvui go festivála bargiid mánát dárbbašedje mánnabiiggá, ja dát lea dál sajáiduvvan juo festiválii, lohká Trollvik.

Hauk Hårekssønn Ryeng

Romssa bártnáš, Hauk Hårekssønn Ryeng (7) lea ovdal searvan Riddu Riđđu mánáidfestiválii. Dán jagi son illuda ráhkadit bátti ja riidet.

Foto: Klemet Anders Sara / NRK-Sápmi

Mánát illudit searvat iešguđet doaimmaide

Dán jagi mánáidfestiválas illudit mánát iešguđet doaimmaide. Romsalaš Hauk Hårekssønn Ryeng (7) illuda heasttain riidet. Ii leat vuosttaš gearddi go Hauk searvá mánáidfestiválii.

Mánát besse oahpat cegget lávu, hábmet stálloháma, riidet, botnit bátti, goikeguoli dikšut ja stálostallat. Stuorimus mánát besset maid searvat luonddumátkái.

Álggadettin ledje mánát áŋgirat čuovvut iežaset láidesteddjiid, ja čađahit iežaset bargguid.

Riddu Riđđu mánáidfestivála rahpan

Riddu Riđđu mánáidfestivála álggii odne ovdalgaskabeaivvi. Dá Sara Marielle Gaup Beaska oahpahallamin mánáide njoammilluođi.

Foto: Klemet Anders Sara / NRK-Sápmi