Reabbáverrošeapmi dikkis: Ii mieđit iežas máfiajođiheaddjin

Loga ášši dárogllii dás.

Otne dat dat ledje vihtta finnmárkulačča rievtti ovddas, maŋŋel go gávnnahalle stuorra politiijaakšuvnnas 2019:s.

Dievdu gean politiijat navdet hutkan verrošemiid, dovddasta verrošan muhtun oasi.

Son mieđiha muhtun muddui sivalažžan váldočuoggás, mas čuoččuhuvvo lobihemiid bivdán 47 tonna reabbá lassin go masa sus lei kvohta.

Reappáin lei árvu birrasii 23 miljovnna ruvnno, árvvoštallon márkanhatti vuođul.

Dievddu advokáhta, Gøran Møller Christiansen, oaivvilda politiijaid bidjan beare ollu siva váldosivalažžii. Son čuoččuha ahte dievdu ii leat akto sivalažžan reabbávuovdimis, muhto ahte doppe leat earát geat stuorra fierpmádaga čađa vuvdet lobihemiid.

Rievttis logai dievddu advokáhta ahte áššáskuhtton dievdu ii leat makkárge váldoalmmái máfias, ja ahte jođiheaddjit čohkkájit Oslos, Romssas ja eará sajiin.

Biehttala reabbáverrošeami

Váldosivalačča guokte bearašlahtu, ja okta vel eará dievdu, geat maid leat áššáskuhtton, eai mieđa iežaset sivalažžan masage.

Okta eará olmmoš vel lassin sidjiide, mieđiha iežas muhtin muddui sivalažžan veahkeheamis páhkket ja fievrredit reappáid.

Politiijat navdet sin oktiibuot bivdán unnimusat 47 tonna gonagasreabbá lobihemiid Finnmárkko mearregáttiin. Logenár' miljovnna ruvnno ovddas galget reappát leat vuvdon miehtá Norgga. Dat lobihis gávppašeapmi sáhttá leat bistán badjel logi jagi.

Fiskeribladet-journalistta Øystein Hage, jáhkká oallugiid imaštallat movt dát sáhttá geavvan čiegusvuođas nu máŋga jagi.

– Go dat vihtta geat leat áššáskuhtton galget čilget iežaset ovddas rievttis, de jáhkán boahtit ovdan elemeanttaid mat sáhttet mielddisbuktit eambbo dutkama áššis, lohka son.

Hagen jáhkká eambbosiid sorrot áššái.

Gonagasreappáid rievvarat

Dutkama vuođul leat dán rádjái unnimusat 52 olbmo áššáiduhtton, ja oallugat leat juo dubmejuvvon dahje sáhkkohallan lobihis gávppašeami ovddas.

Kriminealla fierpmádat galgá leat fuomášuvvon Norgga ja Suoma rájis 2019:s, go duollodoaimmahat duoguštedje stuorimus meari gonagasreappáin goassege.

– Gonagasreabbábivdu lea garrasit regulerejuvvon eriid mielde Nuorta-Finnmárkkus. Bivdit ja vuovdit lobiheamit lea roavva biraskriminaliteahtta ja ekonomiijakriminaliteahtta. Dat billista maid olbmuid oadjebasvuođa bibmui, logai politiijaadvokáhta Aarhus NRKii árat dán jagi.

Vearredagut guolástusealáhusas lea oassin politiija maŋemuš áittaárvvoštallamis mii bođii njukčamánus.

Politiijat leat fuobmán guokte fierpmádaga gos iešguđet ge olbmuin leat iešguđet ge rollat. Dan birra humai váldoáššáskuhtton bealušteaddji otne dikkis.

• Son lea vuovdán reappáid, muhto ii muitte man ollu. Gažaldat lea man ollu son ieš lea bivdán, ja man ollu son lea vuovdán earáid ovddas.

Gøran Møller Christiansen čujuhii politiijaid čilgehussii guokte fierpmádaga birra, mat leat bargan bálddalaga. Muhttimat leat oastán reappáid oallugiin, ja danne ii sáhte váldoáššáskuhtton dievdu oažžut buot siva, oaivvildii son.