NRK Meny
Normal

Rámis go oaččui Áilluhaš-bálkkašumi

Son dovddai Áillohačča bures ja mannan lávvardaga geigejuvvui fargga 78-jahkásaš Johan Andreas Andersenii Áillohas-bálkkašupmi. Sus leat ain CD-plánat, lohká Várjjatvuona juoigi.

Johan Andreas Andersen

Johan Andreas Andersen.

Foto: Dragan Cubrilo / NRK

Unjárgalaš Johan Andreas Andersen deavdá 78 jagi dán geasi, ja sutnje lei stuorra gudni fidnet dien bálkkašumi.

– Dat liggii mu váimmu. Lei nu buorre ahte measta gatnjalat vel bohte čalmmiide. Váibmu njuikii vel.

Erenoamáš go dovddai ieš Áillohačča

Áillohaš-bálkkašupmi almmuhuvvo jahkásaččat Sámi Grand Prix doaluid oktavuođas. Norgga Sámiid riikkasearvi, Guovdageainnu suohkan ja Guovdageainnu Sámiid Searvi leat ásahan Áillohaš-musihkkabálkkašumi, mii guoddá sámi multidáiddára Nils Aslak Valkeapää - Áillohačča nama. Vuosttaš vuoiti 1993:s lei Mari Boine.

Andersen dovddai Áillohačča bures ja dan dihte lei maid erenoamáš sutnje oažžut dán bálkkašumi.

– Moai Iŋgga Jusse-rohkiin oruime su luhtte moadde beaivvi maid okte. Son bovdii munno boahtit dohko

Ilus go eambbosat leat juoigagoahtán

Johan Andreas Andersen lea okta sis gii máhttá daid Várjjatluđiid mat measta juo ledje jávkan ja vajálduvvon. Son lea ilus go maŋemus áiggiid leat eambbosat sin guovllus juoigagoahtán.

– Mis leat olu juoigit dál šaddan Go gonagas finai diibmá Vuonnabađas, de máŋgalogi mánáidgárdemánát juige. Sii ledje nu čeahpit, ja mun gal šadden nu lihkolaš ja jurddašin ahte mis leat boahtteáiggis olu juoigit. Mun gal áinnas maid doalan smávva kurssaid, jus eanebut háliidit oahppat.

CD jurdagis

Vaikko Andersen lea fargga 78 jagi ja váibmočuohpadeamis maid leamaš, de lea ain jurddašeame ahte galggašii CD almmuhit.

– Mun lea jurddašan, muhto mu skihpar Harald Devold, gii huksii studio Njávdámii, jámii aitto. Leimme suinna hállan CD birra, lohká Andersen, geas livččii gal materiála doarvái CD:ii.

– Mus leat orrume vaikko man olu. Mun giittán iežan áhči gii lávii juohke sotnabeaivvi iđida juoigat. Mun fuomášin báddet su. Lean ieš maid ráhkadan luđiid, muitala Áillohaš-bálkkašumi vuoiti Johan Andreas Andersen.