NRK Meny
Normal

Raipon lea fas doaimmas

Norgga sámedikkis illu, go eamiálbmot -ovttasbargo organisašuvdna Ruoššas , RAIPON fas lea doaimmas.

RAIPON
Foto: Jonas Sjøkvist Karlsbakk / Barentssekretariatet


Mannán vahkus mearridedje Ruošša eiseválddit fas addit Davvi ruošša eamiálbmot-organisašuvdna, Raiponii, doaibmanlobi. Raipon bággehallui skábman diibmá loahpahit doaimmaidis, go eiseválddit lohke searvvi rihkkut Ruošša lága. Norgga sámedikki presideanta Egil Olli illuda, go Raipon fas lea doaibmagoahtán. Gielddus lei sakka čuohcat árktalaš álbmogiid ovttasbargui, jos dat fal lei bistit guhkit.

- Dat livčče šaddan oalle váttis, go sii leat maid mielde árktalaš ráđis. Lea somá gullat, ahte Ruošša eisseválddit leat dahkan dan, maid lohpidedje, go deiven Ruošša ambassáda olbmuid Oslos ovdal juovllaid, muitala Olli.

Bággejedje heaitit doaimmaid



Ruošša eiseválddit čuoččohedje skábmamánus diibmá, ahte Raipon njuolggadusat rihkkot Ruošša lága ja nu gohččo Davvi Ruošša eamiálbmogiid oktasaš organisašuvnna heaittihit iežas doaimmaid.

Sámedikkit , eará eamiálbmogat árktisas ja muđuid máilmmis ja maiddái davviriikkat ja eará stáhtat cuiggodedje ruošša eiseválddiid, go ná geahččalit jávohuhttit riika eamiálbmogiid. Raipon lea olu jagiid ovddastan Davvi Ruošša álgoálbmogiid árktalaš ráđis, gos sii leat ovttasráđiid sáminjunnošiiguin ja inuihtaiguin ovddidan árktalaš eamiálbmogiid beroštumiid.

Rodion Sulyandziga, avdelingsleder i RAIPON

Ossodat jođiheaddji Rodion Sulyandziga.

Foto: Jonas Sjøkvist Karlsbakk / Barentssekretariatet

Mannán vahkus loahpahedje ruošša eiseválddit gildosa ja nu Raipon fas lea lobálaš organisašuvdna. Raipon ossodat jođiheaddji Rodion Sulyandziga lea preassadieđáhusa bokte mannán vahkus giitán doarjaga ovddas, maid sii leat ožžon sámiin ja eará eamiálbmogiin .

Dehálaš oktašasbargui


Norgga Sámiid riikasearvvi njunuš, sámedigge áirras ja Barents guovlluráđi lahttu Aili Keskitalo, maid lea ilus, go Raipon fas beassá doaibmagoahtit.

- Sii eai leat beassan lágidit lobálaš čoahkkimiid. Sis leamaš hui váttis bargodilli, mii sihkkarit lea čuohcan sidjiide Ruoššabealde ja maiddái riikkaidgaskasaččat.

Norgga sámediggi deaivvadii moatti Ruossa ambassádan Oslos, čilgen dihte manne lea dehálaš, ahte Raipon fas beassá doaibmagoahtit. Maiddai norgga olgoriikaministtar Espen Barth Eide cuiggodii ruošša eiseválddiid dán áššis.
Sihke Keskitalo ja Olli jáhkkiba, ahte min ja eará eamiálbmogiid áŋgiruššan lea váikkuhan nu, ahte Raipon fas beassá ovddastit Davvi Ruošša eamiálbmogiid.

GULDAL: