Ráhkkaneamen jagi stuorámus dáhpáhussii

– Dát gal lea somá. Mu mielas lea somá lávlut dáppe Kárášjogas olbmuid ovddas, lohká viđátluohkkálaš Benjamin Guttorm (10).

Odne lea Kárášjogas Davvi Norggas okta dán jagi stuorámus dáhpáhusain.

Dalle lágiduvvo Beaivváškonsearta, mas oktiibuot masá golbmačuohte máná ja nuora leat lávddi alde.

Geahča video vuollelis dán čállosis!

Ruhta ávkkálaš doaimmaide

Beaivváškonsearta dollo gudnin dasa go beaivváš lea fas ihtán maŋŋágo guokte mánu lea leamaš jávkosis.

Beaivváš lea gal vuosttaš geardde dán jagi oidnon jo sullii mánotbaji áigi, muhto liikká lea heivvolaš dál easkka ávvudit.

– Dat lea buorre, ahte fas bođii maŋás, lohká Benjamin Guttorm.

Olbmot geat mákset bileahta leat mielde doarjumin buori ášši. Badjebáza oainnat geavahuvvo servvodahkii ávkkálaš doaimmaide.

Dán jagi manná ruhta oasttit stoahkanrusttegiid skuvlašilljui. Ohppiidráđit leat buktán evttohusa ja leat mielde mearrideamen maid oastit.

Beaivváškonsearta lágiduvvui vuosttaš geardde jagis 1991, ja Kárášjoga valáštallanhálla lea álo leamaš spagga dievva.

Nu vurdo dánge jagi.

– Dat lea veaháš issoras, oainnat go leat nu olu olbmot ja mii galgat lávddi alde čuožžut, dovddaha viđátluohkkálaš Sárá Iŋgá Eira (10).

– Mearkkaša olu olles servodahkii

Oahpaheaddji Sissel Gaup lohká, ahte dáinna konsearttain lea mearihis somá bargat.

– Don oainnát mánáin, ahte lea stuorra beroštupmi. Ja ieža leat beassan válljet lávlagiid. Dat eai leat mii oahpaheaddjit geat dahket dan, lohká Gaup.

Benjamin, Sárá Iŋga ja sutno luohkkáskihpárat leat válljen dán guokte lávlaga: «Kom til Finnmark» ja «Miessemearkun».

Dasa lassin leat mielde oktasašlávlagis «Beaivvášlávlla». Oahppit lohket iežaset bures ráhkkanan konsertii.

– Mii leat ožžon ruovttubihttán hárjehallat daid lávlagiid. Ja de leat musihkkadiimmuin beassan hárjehallat ja maiddái eará oahppodiimmuin, čilge Sárá Iŋgá Eira.

Konsearta geasuha olbmuid.

– Mii leat Kárášjogas máŋga jagi ávvvudan dango beaivváš fas ihtá ja dat lea midjiide hui stuorra dáhpáhus. Dat lea stuorra dáhpáhus maiddái danne go mánát hárjánit ovttas bargat ja go guoimmuhat Kárášjoga álbmoga. Dasa lassin lea sápmelaš álo gullan dán beaivváš myhta, ahte mii leat beaivváža mánát, čilge oahpaheaddji Sissel Gaup.