Ášši doaimmaha Piera Jouni Somby
Guollebivdi Odd Lahm ii loga dán jagi iežas bivdofatnasa nu ollu jikŋon, de ii son leat dárbbašan čuollat jieŋaid ovdal go vuolgá bivdui. Son ii loga buollaša dagahit dan ahte fanas jiekŋu, danne go jiekŋun lea gitta das makkár dálki lea muđuid. Muhtimin sáhttá leat dakkáraš jiekŋudan dálki, de dalle gal ferte čuollat jieŋaid.
- Jos son lea bivdimin Várjjatvuonas, na de ii dárbbaš jieŋaid čuollat, eai hal doppe leat bárut mat jiekŋudit fatnasa.
Muhto jos lea dálki dakkár ahte fanas jiekŋu, na de gal ferte čuollat jieŋaid eret. Muđui gal sáhttá leat váralaš, jieŋat sáhttet gomihhit fatnasa.
Buolaš ii baldde guollebivdi
Odd Lahm ii loga buollaša gal baldit, dasa han olmmoš hárjána. Ja dasalassin ii oro meara-alde nu buolaš go nannámis. Buollašii lohká fertet gárvodit buorebut go dábálaččat. Buollaša ii loga dahkat maidige, verret leat beakkat, dalle illá beassa meara-ala, lohká son.
