NRK Meny
Normal

- Lean dolkan almmáiolbmuide

Árdna-jearahallamis muitala Tiina Sanila iežas ođđa skearrus ja das mii lea vuođđun muhtin su teavsttaide.

Tiina Sanila
Foto: Suvi West / NRK

Tiina Sanila almmuhii mannan lávvardaga iežas nuppi CD-skearru man namma lea "Kå`llkue`ll še måttmešt tålkk". Dánge skearrus sápmelaš rocknieida lávlu iežas eatnigillii, mii lea nuortalašgiella. Skearru almmustahttima oktavuođas Sanila doalai konseartta Anáris. Ja min reporttárii, Suvi West, son muitalii rahpasit iežas siskeleammos dovdduin.

Váttis iežas eallima eallit

 

 

Tiina Sanila

Tiina Sanila

Foto: Suvi West / NRK

Jearahallamis Tiina Sanila muitala, ahte dallego čálii teavsttaid dán skerrui lei son issorasat dolkan. - In várra iešge dieđe masa ledjen dolkan. Várra go álo lea nu hoahppu ja inge sáhte nu bures iežan eallima eallit. Dasto leat leamaš veaháš váttisvuođat ráhkesvuođas ja dien láhkái lean veahá almmáiolbmuide dolkan, čilge Tiina Sanila.

Nuorra nuortalaš nieida lohká iežas buohtastahttit golleguollái, ja dát leage skearru namma. Dál sus almmatge leat buoret dovddut go lea beassan siskeleammos dovdduidis muitalit musihkainis. - Vaikko muhtimin lea ain váttis, muhto gal dat liikká manná, čilge Sanila.

Váldá bottu

 

 

Tiina Sanila
Foto: Suvi West / NRK

Tiina Sanila muitala maid, ahte sutnje lea mávssolaš lávlut nuortalašgillii. Dán láhkái son doaivvošii leat ovdagovvan earáide dasa mo sáhtášii geavahit iežas eatnigiela. Liikká ii leat álo nu álki go galggašii čállit teavsttaid. - Dál lea lihkus boahtán ođđa sátnegirji mas leat maiddái dakkár sánit mat dálááigge olbmuide leat dehálaččat. Danne lei álkibut čállit teavsttaid dán skearrui go dan vuosttasii, lohká Sanila.

Dál áigu joavku váldit smávva bottu. Tiina Sanila lohká ahte sidjiide buohkaide livččii mávssolaš studeret veahá ovdalgo fas sáhttet joatkit musihkain.

GULA TIINA SANILA JEARAHALLAMA