NRK Meny
Normal

Ráhkadii koartaspealu oahpponeavvun

«Luonddus birget» lea koartaspeallu maid skuvllas geavahit oahpponeavvun. Koartaspeallu muittuha Monopol spealu, go dás ge lea ruđas ja tinemis sáhka.

Koartaspeallu "Luonddus birget"

Dán koartaspealu lea Leavnnja mánáidskuvlla oahpaheaddji John Turi hutkan ja ráhkadan.

Foto: Anne Olli

«Luonddus birget» lea speallu mainna mahkáš sáhttá tinet ruđa, go dáinna tine jos luonddus viežžá luonddu buriid. Koarttaiguin sáhttá lubmet, bivdit guliid, rievssahiid ja vel ealggaidge.

John Turi koartaspeallu "Luonddus birget".

Dán oahpponeavvu lea John Turi ráhkadan. Son lohká dákkáraš koartaspealuin lea vuogas speallat og mánát dolket čállin bargguin.

Foto: Anne Olli

Go álgá dáinna spealuin speallat de oažžu juohkehaš 5000 ruvnnu. Dainna ruđain sáhttá alcces háhkat bivdinávdnasiid, oasttit spánnja, oaggunstákku, hávlára, na biergasiid maid dárbbaša go luonddu buriid áigu viežžat.

Spealu vuoiti lea son gii eanemus lea tinen

Spealu vuoiti lea son gii eanemusat bivdá, lubme ja murje, ja go de vuovdá dáid buktagiid de tine ruđa. Son gii de eanemusat nagada tinet, son dat lea spealu vuoiti.

Lea Porsáŋggu mánáidskuvlla oahpaheaddji John Turi gii lea hutkan ja ráhkadan dán «Luonddus birget» spealu.

John Turi

John Turi ráhkadii koartaspealu vai mánát muhtimin besset bargat eará go dušše čállit ja lohkat. Dáinna koartaspealuin fuomášit maid mo luonddus sáhttá tietnasa viežžat, lohká Turi.

Foto: Privat

– Sámi mánát ja nuorat leat oaidnán mo olbmot leat viežžan mehciin ja jávrriin sihke murjjiid, guliid ja maiddái bierggu. Ealgabivdu lea dán áigge oalle olu guovlluin, de datge lea oahpes ášši.

Turi lohká ráhkadan dán spealu vai sámi mánáide leat oahpes áššit mas lea sáhka.

Iđut-lágádus dat lea almmustahttán spealu «Luonddus birget».