Lullisámegiel nuoraidskuvlaohppiide eai leat heivehuvvon oahpponeavvut.
– Dát ii leat dohkálaš dilli, lohká Aajege lullisámiguovddáža jođiheaddji Toini Bergstrøm. Guovddáš lea ovttas eará ásahusaiguin ráhkadeamen dárbbašlaš oahpponeavvuid.
– Lullisámegiel oahpponeavvut heivehuvvon nuoraidskuvla ohppiide leat dárbbašlaččat, lohká Aajege lullisámiguovddáža jođiheaddji Toini Bergstrøm. Dálá dilli ii deavdde skuvlaođastusa gáibádusaid.
Dál lea guovddáš ovttas earret eará Plassje ja Grong joatkaskuvllaiguin, ja Sámedikkiin ráhkadeamen ođđa digitála oahpponeavvu.
Digitála oahpponeavvu
– Dán vuogis leat ollu ovdámunit, lohká Bergstrøm. Osiid sáhttá almmuhit dađistaga go válbmanit iige leat nu áddjás bargu go girjebuvttadeapmi. Dasa lassin son jáhkká leat vejolaš olahit eanet ohppiid digitala oahpponeavvuin.
Bergstøm sávvá maid ahte dát buorida lullisámegiela oahppodási ja dahká ahte ii leat ovttaskas oahpaheaddji duohken makkár oahpahus šaddá.
Dán oahpponeavvobarggu eaiggádat leat Lulli- ja Davvi-Trøndelaga filkkagielddat. Davvi-Trøndelága filkkagieldda ráđđeaddi Arnhild Opdahl lohká ahte dát lea buorre vuohki čalmmustahttit lullisámegieloahpahusa. Son jáhkká ahte dákkár oahpponeavvu geasuha eanet ohppiid ja álkidahttá oahpu gazzama.
GULDAL ÁŠŠI: