NRK Meny
Normal

Ráhkadeaba filmma Njereveaji birra

Eiseválddiide ja earáide ferte čálmmustahttit ahte smávvá sámi gilážat, nugo Njereveadji, dáhtošii eallit, das ráhkaduvvo dál dokumentárafilbma.

Hans Ragnar Mathisena kárttas Njereveadji Lákkovuonas Deanuvuonas.

Dán kárttas oaidna Njereveaji, gosa gal ii beasá eará go fatnasiin. Dálvit buorredálkkis sáhttá muohtascohteriin vuodjit badjel vári. Dán gilážii dat dáhtošedje guovllu olbmot geainnu.

Foto: Hans Ragnar Mathisena sámi kárttas govvejuvvon

Torill Olsen

Torill Olsen čállá teavsttaid ja ohcá dieđuid maid dárbbašeaba dokumentarfilbmii. Son lea ovdalge ráhkadan Harry Johanseniin filmmaid Kasta på land ja De gode hjelperan.

Foto: Knut-Sverre Horn

Torill Olsen ja Harry Johansen álgiba dál ráhkadit dokumentara filmma smávva sámi giláža, Njereveaji birra. Soai leaba juo dahkan smávva filmmaža maid čájeheaba daidda gos ohcaba ruhtaveahkki buvttadit dán dokumentára filmma. Beassážiid áiggošeigga juo filbmegoahtit.

Giláža olbmot servet filbmii

Journalista Torill Olsen muitala iežaska álggos vuos deaivvadit olbmuiguin geat galget searvat sutno dokumentára filbmii, earret eará 28 jahkásaš Toniin, gii lea guolásteaddji ja ássá Njereveajis.

Njereveajilaččat dat leatge sii geat galget muitalit iežaset eallimis dán filmmas. Sin haga ii šattašii miige. Ja iežaska Harrin muitala Torill Olsen vuolgit beassážiidda Njereveadjái, danne go dalle lávejit sii lágidit doaluid ja doppe de deaivá Njereveajilaččaid.

Njereveadji smávva mearrasámigiláš Lákkovuonas Deanuvuonas.

Doppe eai ása eanet go 29 olbmo. Gilážii ii leat geaidnu, dokko beassá fatnasin ja dálvit muohtaskoteriin badjel vári. Njereveajilaččat ellet guollebivdduin ja eanadoaluin. Doppe leat gáica- ja sávzadoallit. Ja olbmot leat doppe birgen áiggidčađa, go biepmu sii leat ieža háhkan mearas ja váris.

Dokumentárafilmmain dovddusindahkat giláža

Torill Olsen muitala iežaska Harri Johanseniin ráhkadit dokumentara filmma Njereveaji olbmuid eallimis, danne go dál han lea nu ahte eiseválddit áiggošedje buot ássiid čohkket stuorát báikkiide. Orru leamen nu ahte gilážiid áiggošedje gurret, ja dasalassin orru leamen vearrámus dilli mearrasámi gilážiin.

Harri Johansen ja Torill Olsen áiggošeigga dáinna dokumentarafilmmain čájehit makkár dilis boaittobeali ássit ellet, mo sii rahčet justa danne go sii hálidit ássat ja eallit boaittobealde

Filbma galggašii gárvánit 2017

Jurdda livččii gárvvistit filmma boahte jagi, muhto eaba dieđe mo ruhtahcamušaiguin manná, go dál soai ohcaba dán bargui ruhtadoarjagiid duoppil dáppil.

Soai leaba gal ožžon ruđa rahkadit pilohta, mas oaidna makkár áššis lea sáhka, ja dán filmmaža sáddeba maid dokko gos ruhtadoarjagiid ohcaba, muitalaleaba filbmadahki guovttos Torill Olsen ja Harry Johansen.