Sámi Kulturguovddáš Anáris rahppo boahtte jagi álggus, danne galgá Outi Pieski dáiddabargu leat gárvánan dassážii. Modealla dahje málle son gal juo lea gárvvistan, muhto dat dáidda, dat dat gal lea mealgat stuorát go dat modealla, lohká dáiddár Outi Pieski.
Ráhkada stuorebuš dáidaga
Dát lea oalle erenoamáš dáidda maid son lea ráhkadeamen, ja dasa gal dárbbaša stuorebuš saji.
Ja dáidda maid son lea ráhkadeamen, dan lohká leat dan mađi váttes bargun ahte fertii das vuos ráhkadit smávit modealla dahje málle, vai oainnášii mo dat galggašii šaddat go gárvána.
Dáiddár lea bajásšaddan gávpogis
Iežas muitala Outi Pieski bajásšaddan Helssegis, doppe lea maid váldán dáidda oahppu, muhto vihta jagi áigi fárrii son bearrašiinnis smávva gilážii, Dálvadassii deanuleahkái Supmii.
Dáppe son dál smiehttá ja hápme dáidaga, mii galgá Sámi Kulturguovddážii Ánárii.
Bargan dáiddárin juo guhká
Ii Outi Pieski loga álo ráhkadit modeallaid dáidagiin maid álgá ráhkadit. Njuohtan dahje málen barggus gal ii daga dan, go njuohtan barggus son dego eallá iežas dán dáidaga sisa. Iežas lohká dego háleštit dainna mainna lea bargamin.
Kulturguovddážii ráhkada installašuvnna
Anára Sámi Kulturguovddážii son leage ráhkadeamen dan erenoamás fiinna dáidaga, installašuvnna. De dál lea beare illudait dassá go guovddáš ráhppo boahte jagi, go dálle de beassat darvvihit čalmiideamet Outi Pieski erenoamaš dáidagii, ja návddašit dán maid oaidnit. Dál son ii moge vuos mieđit čájehit das mas lea ráhkadeamen.