Biret Ovllá Ásllat/ Aslak Pieski (63) gollada beivviid boalddašit dola ja luoitit bussáid olggos. Son lea okta golbmasis gii ii beasa šat bargui Norgii Buolbmága bokte.
Pieski imaštallá sakka dili, go njuolggadusat eai oro seammaláganat buot rádjaguovlluin.
IMAŠTALLÁ: Biret Ovllá Ásllat ii ádde manne son ii beasa bargui Norgii, muhto earát gal besset.
Foto: Piera Balto / NRK– Mo bat nu sáhttá ahte mii geat bargat Deanu sámeskuvllas eat beasa Norgii, muhto eará sajiin gal besset skuvllabargit rasttildit rája, imaštallá son.
Su mielas dat gal lea buorre ruovttus buđaldit buolašin, muhto gal dat livččii buorre beassat bargui maid.
– Sávvamis dát ártegis dilli ii bisttašii menddo guhká.
- Loga maid:
– Mánát ja nuorat dat gillájit
Deanu Sámeskuvlii lea koronadilli šaddan stuorra hástalussan. Skuvllajođiheaddji Berit Ranveig Nilssen oaččui dieđu lávvardaga ahte su golbma suomabeale bargi eai šat beasa rasttildit rájá vuossárgga rájes.
– Mii leat gártan hui váttis beaivválaš bargodillái, go ii leat beare viežžalit sadjásaš sámegieloahpaheddjiid, čilge Nilssen NRKii.
HEAĐÁSTUVVAN: Berit Ranveig Nilssen rahčá go fáhkka eai leat doarvái sámegieloahpaheaddjit su skuvllas.
Foto: NRKSon muitala maid ahte dat lea lassi noađđin daidda geat leat barggus, go sii fertejit váldit badjelasaset golmma bargi bargguid. Son ii dál dieđe mo viidáseappot.
– Dál mii eallit beaivvis beaivái, inge máhte muitalit mo šattaš gal jus ná šaddá guhkit áigge, lohká son.
Sátnejođiheaddji lea čállán reivve daidda geat mearridit, ja čilgen mo sámemánáid dilli lea.
Nilssen sávvá dál ahte Norgga eiseválddit váldet dili duođas, ja suvvet skuvllabargiid rasttildit rájá.
– Dát oainnat čuohcá garrasit mánáide ja nuoraid go eai oaččo dan giellaoahpahusa masa sii lea riekti.
- Loga maid:
Njuolggadusat leat seammaláganat
Dat eai leat iešguđetge lágan njuolggadusat. Vuossárgga rájes ii sáhte oktage oahpaheaddji boahtit Norgii lobálaččat.
– Oahpaheaddjit eai šat rehkenastojuvvo kritihkalaš servodatdoaibman, danin eai sáhte boahtit Norgii, vástida Finnmárkku politiijaguovllu láhkajurista Kristine Shanika Øvergård.
Dat leat Norgga eiseválddiid njuolggadusat mat mearridit geat besset Norgii ja geat eai.
Son deattuha ahte oahpaheddjiin lea dehálaš doaibma, ja ádde bures ahte čuohcá garrasit ovtta skuvlii go golbma bargi fáhkka eai leat šat beasa bargui.
– Mii geahččalat gávdnat buriid čovdosiid, ja dieđihat eiseválddiide go oaidnit dakkáriid mat eai leat nu buorit rádjaássiide, čilge Øvergård.
