NRK Meny
Normal

Skábma: rašes jieŋaid áigodat

Skábma lea váralaš áigi badjeolbmuide ja muđuid meahcásteddjiide. Vaikko vel orrugo oadjebas, de eai soaitte jávrrit ja jogat vel albma láhkai galbmon.

Kulde
Foto: Birger Eriksrud

Gažaldahkii ahte movt meahcásteaddjit berrejit rassat dáid muttuid meahcis, vástida Guovdageainnu leansmánni, Klemet Klemetsen ahte lea čielggas, jus fal rasttildit áiggot joga dahje jávrri, de berret iskat guoddágo jiekŋa vai ii.

Badjeolbmuide gal diehttelasat mun in dárbbaš nu menddo olu muitalit dahjege rávvet. Meahcástallat skábman goas jieŋat leat váralaččat, dan gal sii máhttet hui bures, muhto diehttelasat, siige fertejit muitit jurdilit ovdalgo mannet jieŋaid ala, dadjá Klemetsen.

Son maid muitala ahte olbmot geat beaivválaččat eai vánddar meahci, eai soaitte álo muitit man váralaččat jieŋat duođaid sáhttet leat.

  • Guldal rádiojearahállama Guovdageainnu leansmánniin dás:
Klemet Klemetsen

LEAT VÁRRUGAS: Guovdageainnu leansmánni Klemet Klemetsen rávve olbmuid leat várrugasat jieŋaid ala mannat dáid muttuid.

Foto: Nils John Porsanger / NRK

Maid dahkat?

Maid dahkat jus doddjo jávrái dahjege johkii, galgágo politiijain váldit oktavuođa?

– Jus bures manne, de gal ii leat dárbu politiijain váldit oktavuođa, muhto jus fal duođalaš dáhpáhus ahte muhtin omd. heavvana, de gal galgá politiijain váldit oktavuođa, Klemetsen čilge.

(Politiijaid heahtenummar: 112)

Her går NRKs reporter gjennom isen

ČÁJÁHUSGOVVA: – Dávjá leat nuorra olbmot geat iskkadit rašes jieŋaid, ja dakkár oktavuođain lea bahá bártidit.

Foto: NRK

Buollašat sihkkarastán jieŋaid

Dán skábma leamaš oalle buolaš Guovdageainnus, ja Klemet Klemetsen lea gulaskuddan boaittobeale ássiiguin, makkárat jieŋat leat sin guovlluin. Eatnašat duođaštit ahte jieŋat leat lagabui moaddelot sentimehtera asu, ja nu eai leat heaggaváralaččat.

Jus it olu meahcástala, itge máhte árvvoštallat jieŋa, de daga ja čuolas ráiggi jikŋii ja árvvoštala, orrugo jiekŋa gierdamin, Guovdageainnu leansmánni loahpas vel rávvesta.