NRK Meny
Normal

Ráđđi almmuha rápmonlistta

Sámediggeráđđi lea iežas doaibmaáigodaga ovddas almmuhan 20 čuoggá sturrosaš politihkalaš rehketdoalu. Presideanta Vibeke Larsen mieđiha ahte ii buot áššiin gula gudni dušše ráđđái.

Vibeke Larsen ja Piera Balto

RÁPMONLISTA: Sámediggepresideanta Vibeke Larsen čájeha Piera Balto:i man ollu sii leat bargan gávcci mánus.

Foto: Nils John Porsanger / NRK

Sámediggeráđis leat Vibeke Larsen (presideanta, Sorjakeahtes), Lars Filip Paulsen (várrepresideanta, Olgeš), Inger Eline Eriksen (Árja) ja Mariann Wollmann Magga (Bb). Dán leat sii olahan dan logi mánus go leat stivren Sámedikki

20 čuoggá sturrosaš sámediggeráđi politihkalaš rehketdoalus lea presideantta mielas oahpahusášši dat deháleamos.

– Oahppoplána ja sámi oahpaheddjiid rekrutteren ja dasa lassin bidju mii lasiha oahpaheaddji ohppui ohcciid, lea su mielas eanemus vuoruhanveara, lohká Larsen.

Presideanta lea duhtavaš su ja ráđi bargguin. Earret eará namuha son ahte sin áigodagas loktejuvvui Sámi lohkanguovddáš nášunála dássái, sii leat dorjon Deanusoahpamuša vuostálastiid sihke ekonomalaččat ja strategalaččat ja Ä'vv nuortasámi musea lea rahppon.

– Ohcalan ovtta dihto ášši

Aili Keskitalo

IMAŠTA: Ráđđi han ii fievrredišgoahtán ođđa politihka nu og áigo, muhto barge viidáseabbot áššiiguin maiguin sii ledje álgán, lohká Keskitalo.

Foto: Nils John Porsanger / NRK

NSR presideantaevttohas Aili Keskitalo lea duhtavaš go ráđđi lea bargan viidáseabbot áššiiguin maiguin sii ledje bargamin go masse fámu.

Imaštan dušše ahte go válde fámu juovlamánus, de logai presideanta Vibeke Larseen ahte son áigu ođđa politihka fievrridit Sámedikkis, muhto orru nu ahte sii leat eanaš joatkán áššiiguin maid mii leat álggahan.

Keskitalo dattetge ohcala erenoamážit ovtta ášši.

– Mun váillahan dan konsultašuvdnalága maid ráđđehus árvalii ja fálai Sámediggešráđđái maid sámediggeráđđi ii dohkkehan, čilge Keskitalo.

Viiddis ovttasbargu

Presideanta ii gohčot rehketdoalu čuoggáid dušše iežaset ráđi gudnin.

– Ii leat oktage ášši masa ráđđi okto ánssáša rámi, go dás lea leamaš viiddis ovttasbargu olles sámi servvodagain nu go duohtavuođa kommišuvnna ásaheami olis, mii ii livččii duohtan šaddan sámi servvodaga doarjaga haga, lohká presideanta.

Sámediggepresideanta Vibeke Larsen válddii badjelasas presideantaámmáha juovlamánus diibmá, go ovddidedje eahpeluohttámuša Aili Keskitalo:i ja su politihkkálaš stivrejupmái.