NRK Meny
Normal

Ain eahpesihkkarat masa Utøya-ruđat leat geavahuvvon

Kárášjoga ráđđeolmmái fertii odne vástidit gosa Utøya-ruđat leat šaddan.

Karasjok
Foto: Ingvill Sunnby / NRK

Muhto ain lea eahpečielggas masa gielda lea geavahan 2,3 millijovnna maid Kárášjohka lea ožžon vai nákcejit veahkehit nuoraide geat vásihedje terrordaguid Utøyas.

– Dál lea áigi muitalit duohtavuođa, lohká Ingvald Laiti, dárkkistanlávdegotti jođiheaddji.

Laiti ii lean duhtavaš go oaččui guovttelágan čilgehusa masa Utøya-ruđat leat geavahuvvon.

Loga eambbo: Utøya gillájeaddji ožžon unnán veahki gielddas

Gažadeapmi

Kárášjoga gieldda dárkkistanlávdegoddi gažadii odne ráđđeolbmá ja dearvvašvuođa- ja fuolahusjođiheaddji ruđaid birra, mat galge geavahuvvot veahkehit nuoraid geat vásihedje terrordaguid Utøyas 2011s.

Dárkkistanlávdegoddi ii ožžon čielga vástádusa čoahkkimis gosa ruđa leat šaddan.

Guokte čilgehusa

Ráđđeolmmái, Elfrid Boine, lohká ruđat leat geavahuvvon veahkkebálvalussii, muhto dearvvašvuođajođiheaddji ii loga diehtit ahte leat go oba ožžon ge ruđaid jagi 2013.

Ráđđeolmmái čuoččuha goitge ahte son nagoda duođaštit raporttas, maid ovdanbuktet juovlamánus gielddastivrii, ahte ruđat leat geavahuvvon veahkkebálvalusaide.

Kárášjogalisttu dáhtui dárkkistanlávdegotti iskagoahtit ášši. Sin jođiheaddji ii loga iežas jáhkkit dasa mii daddjui otná čoahkkimis.