Áigu buoridit sámegiela dili suohkanis

Maŋŋel váibmogiela seminára Gáivuonas, de áigu suohkana ráđđeolmmái, Einar Pedersen bidját návccaid buoridit sámegiela dili. Sin bealis lea buoridanmunni erenoamažit mánáidgárddin.

Mánát stohket Riebangárddi olggobeal

Ii ovttage mánáidgárddin Gáivuonas leat beaivválaš giella sámegiella. Dál fertejit bidját návccaid buoridit dili lohká, Gáivuona ráđđeolmmái Einar Pedersen. Dá Gáivuona mánáidgárddi mánát stoahkamin olggabeal Rieabangárddi ossodaga Olmmáivákkis.

Foto: Klemet Anders Sara / NRK-Sápmi

Váibmogiela seminára Gávuonas ovddit vahkku bođii ovdan ahte ferte bidját olu návccaid ealáskahttit sámegiela suohkanis, nugo NOU 2016:18 guorahallan čájeha.

Lunddolaš loktet sámegiela gelbbolašvuođa mánáidgárddiide

Rådmann i Kåfjord, Einar Pedersen

Gáivuona ráđđeolmmái, Einar Pedersen áigu bidját návccaid gádjut sámegiela suohkanis. Dál lea dehálaš loktet sámegielat gelbbolašvuođa vuosttažettin mánáidgárddin.

Foto: Klemet Anders Sara / NRK-Sapmi

Gáivuona ráđđeolmmái, Einar Pedersen oasálasttii ieš váibmogiela semináras Dálusvákkis. Su mielas orru dál lunddolaš bidját návccaid loktet sámegiela gelbbolašvuođa mánáidgárddin, vuoi sáhtášii buoridit gielladili. Dál šaddá bargu oččodit iežaset bargit geavahit sámegiela, ja dasa lassin soitet šaddat viežžat sámi gelbbolašvuođa eará guovlluin, lohká Pedersen.

Ráđđeolmmái lohká dán ádjás bargun, ja dát ii sáhte dahkkot nu jođanit. Go Gáivuona suohkan lea sámi hálddášan guovllus, de ii leat go bargagoahtit sámegiela gelbbolašvuođain suohkanis. Suohkan lea dál bidján johtui iskkanbarggu mii galgá ovdanbuktit makkár dilis duođái lea sámegielas, ja mo buoridit gielladili.

Sámi mánáidgárddi ossodagas eai sámás obbaáiggi

Gáivuonas lea sámi mánáidgárddi ossodat Olmmáivákkis, Riebangárdi. Dáppe eai huma buot bargit sámegiela, ja de šaddá nuo ja ná dat sámásteapmi muitala bargi gii ii gal almmolaččat áiggo dán muitalit. NRK-Sápmi dieđuid mielde leat maid soames vánhemat geat eai leat duhtavaččat otná sámegielat fálaldagain Riebangárddis.

Gáivuonas leat golmma báikkis mánáidgárddi, Dálusvákkis, Biertaváris ja Olmmáivákkis dáru- ja sámi ossodat. Buot mánáidgárddin lea sámegielat fálaldagat, muhto ii ovtta mánáidgárddis leat beaivválaš giellán. Dá lea juoga mainna fertejit bargagoahtit lohká ráđđeolmmái, Einar Pedersen.

Guldal jearahallama Einar Pedersenin, dárogillii:

Rådmann i Kåfjord, Einar Pedersen.