Dá leat dat ođđa koronanjuolggadusat

Loga dárogillii

– Mii sáhttit ložžet máŋga doaibmabiju, mat leat ásahuvvon njealji vahku dassái, muitala stáhtaministtar Jonas Gahr Støre.

Alkohola lea fas lohpi guossohit, muhto dušše diibmu 23.00 rádjái.

– Alkoholaguossoheapmi galgá dáhpáhuvvat bevddiin, go dat dagaha ahte guossit unnit lihkadit ja dat nanne njoammusuddjema, čilgii dearvvasvuođaministtar Ingvild Kjerkol.

Rievdadit errennjuolggadusaid

Ráđđehus áigu nuppástuhttit errennjuolggadusaid, nu ahte iskosat sáhttet sakka eambbo boahtit errema sadjái.

Njoammuerren «eará lahkaoktavuođaide» njommon olbmuide - namalassii daidda geat eai ása seammá dálus - lonuhuvvo iskosiin.

– Lagamuš mánuid áigge soitet ollugat njoammuduvvot, ja jávkan barggus soaitá leat allat. Buot fitnodagat ja doaimmat fertejit dasa ráhkkanit. Ferte plánet doallat eanemus vejolaš dábálaš doaimma váttis dilis. Rievdadusat maid ráđđehus dál čađaha galggašedje váikkuhit dasa, ahte eambbosat sáhttet eallit dábálaš eallima. Dan galggašedje sáhttit dahkat, vaikko leage olu njoammu servodagas, dadjá dearvvasvuođa- ja ovdamorašministtar Ingvild Kjerkol.

Njuolggadusat gustojit bearjadaga ođđajagimánu 14. beaivvi čuovganeami rájes.

Loga eanet koronaođđasiid dáppe:

Eambbo olbmot besset doaluide

Ráđđehus diktá dál gitta 200 olbmo searvat doaluide viesuid siste jus doppe leat čohkkánsajit mat leat giddejuvvon.

Dát eaktuda, ahte njoammusuddjen váldo vuhtii gaskkain ja njálbmesujiin. Jus čohkkánsajit eai leat giddejuvvon de lasihuvvo lohku 20 olbmot 30 olbmui, čuvgii ráđđehus otná preassakonferánssas.