NRK Meny
Normal

Ráđđehus áigu nannet ráđđádallama Sámedikkiin – muhto ii fal ruđa hárrái

Ođđa konsultašuvdna láhka galgá geatnegahttit stáhta lága bokte ráđđádallat sámedikkiin. Muhto ahte Sámediggi ii beasa ođđa lágas ráđđádallat stáhtain sámedikki bušeahtas, ii leat presideanta mielas dohkálaš.

Jubileumsgudstjeneste i forbindelse med tråante2017 i Nidarosdomen.

II HÁLIIT RUĐAID BIRRA HÁLLAT: Stáhtaministtar Erna Solberg ja ráđđehus áiggušii geatnegahttit ráđđádallama Sámedikkiin lága bokte, muhto ii dáhto Sámedikki bušeahta birra hállat Sámedikkiin ja sámediggepresideantta Vibeke Larseniin.

Foto: Ole Martin Wold / NTB scanpix

– Sámedikkis ii leat leamaš makkárge dadjamuš stáhta ruhtajuolludemiide sámediggái, dadjá sámediggepresideanta Vibeke Larsen.

Váikko leat buori áigumušat, de eai čuovvuluvvo, oaivvilda son, ja joatká:

– Mii leat máŋgii vásihan ahte sis leat buorit áigumušat iešguđegelágán doaimmaide, muhto go de šaddá ruđas sáhká de eai ollašuhtte gáibádusaid. Lea dehálaš ahte buorit jurdagat čuovvuluvvojit maid ruđalaččat.

Norgga ráđđehus lea ráhkadeamen ođđa konsultašuvdna lága.

Dát galgá geatnegahttit stáhta lága bokte ráđđádallat sámedikkiin ja eará sámi beroštumiin go lea sáhká áššiin mat gusket sámi ealáhusaide ja kultuvrii. Muhto ođđa láhka evttohusas ii beasa sámediggi ráđđádallat stáhtain sámedikki bušeahtas.

Spørretime på Stortinget

II VÁSTIT: Gielda- ja ođasmahttinministtar Jan Tore Sanner ii háliit vuos hállat NRK:n ášši birra.

Foto: Lise Åserud / NTB scanpix

Deaivvada sámeáššiid ministtarin

Bearjadaga deaivvada Vibeke Larsen gielda- ja ođasmahttinministtarin Jan Tore Sanneriin digaštallat evttohusa ođđa láhkii, «Endringen i sameloven om konsultasjoner med samiske interesser».

– Mon sávan ahte sámediggi ođđa konsultašuvnna lága bokte beassá ráđđádallat stáhtain ekonomalaš eavttuid birra ja mot ruhta juolluduvvo stáhtas sámediggái, dadjá Larsen.

– Láhka lea nannoseabbo

Jagi 2005 rájis leat Norgga stáhta ásahusat leamaš geatnegahtton ráđđádallat Sámedikkiin dahje eará sámi beroštumiin go lea leamaš sáhká áššiin mat gusket sámi ealáhusaide ja kultuvrii.

Dát lea leamaš šiehtadus álbmotrievtti vuođul gos daddjo ahte stáhtat leat geatnegahtton konsulteret eamiálbmogiin. Sámi vuoigatvuođalávdegoddi lea evttohan ahte dát berre leat oassi lágas iige dušše šiehtadussan.

Sámediggepresideantta lea duhtavaš ahte dát dál evttohuvvo láhkán.

– Lea ollu nannoseabbo go konsultašuvdna geatnegasvuohta lea lágas. Mii vásihit dávjá ahte eisseválddit dulkojit konsultašuvdnavuoigatvuođa iešguđege ládje ja máŋgii maid áibbas boastut.

Gielda- ja ođasmahttinministtar Jan Tore Sanner ii hálit vuos dadjat maidige dán ođđa láhka evttohussii.