Raporta čájeha ahte Ruoŧas lea unnán dieđut mo sin eamiálbmot veadjá psykalaččat.
– Áibbas heahpat, lohká guorahalli ja psykologa Petter Stoor.
Son muittuha ahte Ruoŧŧa lea okta dain máilmmi riggásamos riika. Danin su mielas lea áibbas dohkkemeahttun, go eai dieđe makkár dearvvašvuođa dilli sin eamiálbmogis lea.
- Dá lea raporta:
Doaivu ahte raporta váldo duođas
Diimmá giđa dat Ruoŧa ráđđehus juolludii 700.000 ruvnnu Sámediggái čađahit guorahallama.
– Mun doaivvun raportta čájehit makkár váilevašvuođat gávdnojit, ja ahte politihkkarat váldet dan duođas, dadjá Stoor.
Iešsorbmen-jurdagat
Raporta čájeha ahte gávdnojit earáhusat das ahte makkár psykalaš dilli ruoŧŧilaččain ja sápmelaččain lea.
Dá lea dušše muhtun ovdamearkkat:
- Juohke nubbi nuorra sámi nissonolmmoš lea goas nu jurddašan váldit iežas heakka.
- Juohke goalmmát nuorra boazodoalli lea árvvoštallan váldit iežas heakka.
- Dievdduin geat leat boazodoalus lea stuorát jugešvuođa váttisvuođat go eará ruoŧa dievdduin.
- Boazodolliin lea unnit luohttámuš dearvvašvuođaásahusaide go eará Davvi-Ruota ássiin, jáhkkimis dan geažil go dearvvašvuođabargiin lea váilevaš sámegiel- ja sámekulturmáhttu.
Árvala sierra doaibmabijuid
Čielggadeamis árvalit doaibmabijuid mot buoredit dili.
Earret eará árvalit juolludit ruđaid Sámediggái vai sámi politihkkárat sáhttet bargagoahtit dearvvašvuođa áššiiguin.
Raporttas boahtá ovdan ahte Sámedikkis ii leat dál mandáhta bargat dearvvašvuođa áššiiguin, ja váilot maid ruđat dasa.
Psykologa Petter Stoor vuordá ahte dieđut mat bohtet ovdan raporttas, váldojuvvojit duođas maiddái ráđđehusas.