PST goziha Arctic Frontiers konferánssa
Dán vahkku lágiduvvo «Arctic Frontiers» konferánsa Romssas.
Arctic Frontiers lea deaivvadan- ja čoahkkinarena davviguovlluid politihkáriidda, dutkiide ja ealáhusjođiheaddjiide.
Dábálaččat lávejit bovdet maiddái ruoššabeal olbmuid, muhto maŋŋá go Ruošša soahttái Ukrainain, de eai leat sii beassan searvat.
Dán jagi muitala Arctic Frontiers direktevrra Anu Fredrikson ahte dilálašvuohta lea duođalaš.
– Eahpitkeahttá mii leat duođalaš dilálašvuođas. Árktalaš ovttasbargu nu go mii dan dovdat lea orustuvvon gaskaboddosaččat. Mis measta ii leat obage ruoššabeale ovddasteaddjit.
Politiijaid sihkarvuođabálvalus, PST, leat ráhkkanan konferánsii, ja sii gozihit dan.
Romssa guovllu PST jođiheaddji Gunnar Fugelsø muitala NRK:i ahte sii čuvvot konferánssa.
– Dat dutkan mii ovdanbukto konferánssas doallá alla dási, ja soaitá leat miellagiddevaš stáhtaide maiguin mis ii leat oktavuohta sihkarvuođapolitihka dáfus.
Les saken på norsk her:
