– Boazodoallu ii jávkka ruvkkiid geažil

Sápmelaš servodatberošteaddji lohká ruvkedoaimma leat ávkin ássiide Fálesnuoris. – Dát ferte leat deháleamos, dadjá son.

Johan Klemet Kalstad

DOARJU NUSSIRA: Penšuneren professor Johan Klemet Kalstad lohká leat dárbbašlažžan ávkkástallat luondduriggodagaid.

Foto: Johan Isak Siri

– Jus ii beasa lihkahallat dáid luondduriggodagaid, de boahtá dat boares gažaldat; mainna galgat mii eallit, dadjá Johan Klemet Kalstad NRK:i.

Son lea ollen ealáhatahkái, muhto oasálastá servodatdigaštallamis seammá áŋgirit go ovdalge. Kalstad lea Sámi allaskuvlla professor emeritus. Son lea dárkilit čuvvon Nussir ruvkeásaheami ságastallama.

– Ii leat dušše válljet dienasbarggu

Dál dieđiha čielgasit maid oaivvilda:

– Mii fertet dohkkehit ahte dáid luondduriggodagaid geavaha ávkin álbmogii, dadjá son.

Kalstad oaivvilda ahte lea olbmo geatnegasvuohta ja vuoigatvuohta hálddašit dáid riggodagaid nu ahte dat nanne ássama.

– Olbmot orrot dakkár servvodagain mat leat doaresbealde gos ii leat dušše válljet maid don barggat ja makkár dienasbarggu don oaččot. Danin mii fertet dohkkehit ahte daid luondduriggodagaid geavaha ávkin álbmogii. Servvodat oažžu dás ávkki vaikko muhtin hávvi šaddá luonddus, dadjá son NRK:i.

Jierpmálaš hálddašeapmi ja ávkkástallan váikkuha dasa ahte sámi servvodagat bisuhuvvojit, deattuha son.

Doppe gos boazodoallu birge buoremusat

Digaštallamis lea leamašan olu sáhka man láhkai Nussira - ja Gumppenjuni ruvkkit sáhttet heađuštit ja billistit boazodoalu.

Dán ii čuovvul Johan Klemet Kalstad. Son čujuha doibmii mii ásahuvvui 1970-logus Fálesnuorrái.

– Fiettar orohat lea eallán daid guovlluin gos lea ruvki, ja lea maid sturron ja ovdánan, dadjá Kalstad.

Per Johnny Skum ved borehull

VÁTTIS: Per Johnny Skum lea oaidnán ja čuvvon Nussir-doaimma maŋimuš jagiid.

Foto: Bente Bjercke / NRK

– Veadjemeahttun

Muhto Fieddara siidda ovdaolmmoš, Per Johnny Skum:s (49), lea áibbas eará oaidnu.

– Jo, mii leat gullan ahte lea vejolaš eallit bálddalaga ruvkedoaimmain, muhto dát lea áibbas veadjemeahttun, dadjá son NRK:i.

Son lohká leat váivin go boazodoalu máhttu ja vásáhusat eai anit maninge.

– Mii han leat čoaggán oahpu dan ovddit áigodagas go lei ruvke doppe. Čearpmahat jápme, ja dalle duođaštuvvui ahte ruvkegavja lei sivvan. Muhto dán eai višaba gullatge dál. Ja dutkan mii doarju min, na dan cogget vuolimužžii, dadjá Skum.

Son navdá ahte olusat orohagas gártet heaitit ruvkedoaimma geažil.

– Iihan doppe šat leat vejolaš doalahit guotteteatnama, ja dalle ii leat šat vejolaš ceavzit, Skum dadjá.