Finnmárkku Dearvvasvuohta váldá ođđajagi rájes badjelasas buot ambulansabálvalusa Finnmárkkus.
- Giela dáfus in jáhke oažžut dan seamma fálaldaga maid otne ožžot.
Okta sivain dasa lea go galget ođđa oahppanolbmot sadjái, lohká Guovdageainnu ambulansa-eaiggát Johan N. Turi.
- Váttisvuođa šaddat vávjit
- Go sámegieloassi bázahallá de šaddat vávjit dan erenoamážit sámeguovlluin boares olbmuid ektui.
Váttisvuohta šaddá maid báikenamaid gulahallan oktavuođas, oavvilda Turi.
- Privahta šiehtadusat nohket
Šiehtadusat privahta ambulansafitnodagain heitet doaibmamis Finnmárkkus ođđajagi rájes.
Dan rájes galget rievdadeamit čađahuvvot danne go bálvalus lea spesialiserejuvvon, ja šaddá eambbo ja eambbo medisiinnalaš bálvalussan.
Otná bargit besset joatkit
Buot ambulánasabargit geat dál barget priváhta ambulánsfitnodagain ožžot fálaldaga bargat iežaset guovllu dearvvašvuođa doaimmahagas.
Davvi Dearvvašvuođa stivra dat mearredii dan juo bealgoalmmat jagi dassái.
Ovdalis leat njeallja dearvvašvuođadoaimmahaga Davvi-Norggas váldán badjelasaset ámbulánsadoaimma, ja dál lea dušše Finnmárku vel báhccán privahta fitnodagaid háldui.
- Buorre go beassá eret
Kárášjoga ámbulánsaeaiggát Dag Nedrejord lea ilus go beassá eret stuorra ovddasvástádusas.
Son lohká ollu buriid beliid dan ođđa bargovuogádagas, muhto váillaha dieđuid dál moadde máno ovdal go šaddá stáhtabargin..
- Sámegiella ii jávkka
Finnmárkku Dearvvašvuođa dutkan- ja fágaovddidanjođiheaddji Erik Fjellstad rábmo iežaset fágačehppodága, ii ge loga sámegiela jávkat dan ođđa ámbulánsabálvalusas.