Stockholm pride: – Dehálaš čájehit sámiid oassálastima ge ávvudeamis

– Pridevázzin Stockholmmas lea mu mielas jagi eanemus mávssolaš ja dehálaš beaivi, lohká Madeleine Niarga, SVT Sápmái.

Son lea Amnesty Sápmi prošeaktajođiheaddji. Niarga mielas lea maid dehálaš čájehit servvodahkii ahte eai sámit ge leat dušše heterofiila olbmot.

– Pride lágiduvvo earret eará olmmošvuoigatvuođaid čalmmustahttimii, muhto mu mielas lea maid hui dehálaš čájehit ahte sámit ge gullet dan nu gohčoduvvon arvedávgebearrašii, lohká son.

Ruovttugilis ii dohkkehuvvon

Son lea bajásšaddan smávit gilis gos dovddai ahte eai buohkat doppe dohkkehan dan ahte son lei earálágan.

Dál son háliida doarjut eará nuoraid geat leat nie rašes dilis.

– Ollesolmmožin dovden ahte munnje lea dehálaš bealuštit buohkaid olmmošvuoigatvuođaid, vai buohkat besset ráhkistit aiddo fal dan gean sii háliidit, lohká Madeleine Niarga SVT Sápmái. (sus govva)

Doarju eará unnitálbmogiid

Ruoŧa politiijat leat čavgen bearráigeahču Stockholm pride oktavuođas. SVT:ii deattuhit politiijaid njunnošat ahte sii eai leat gal makkár ge erenoamáš áitagiid birra gullan.

Niarga maid deattuha ahte sutnje maid lea dán oktavuođas dehálaš movttiidahttit olbmuid geat gullet unnitčearddaide duostat searvat pridedoaluide.

Diibmá ledje sámi LBHT-joavku bovden romálbmoga ovddasteaddjiide ge mielde pridevázzimii.

– Dalle ledje vuosttas geardde maiddái romálbmoga ovddasteaddjit mielde dán vázzimis Stockholmmas. Mu mielas lei hui erenoamáš dan beassat vásihit, lohká son.

1998:is dat lágiduvvui Stockholm pride vuosttas geardde.