Presideanta rámidii Agnete dievasčoahkkimis odne

Sámediggepresideanta Aili Keskitalo rámidii Norgga Melodi Grand Prix vuoiti Agnete Johnsena iežas sáhkavuorus Sámedikki dievasčoahkkima álggadettiin odne.

Melodi Grand Prix

Unjárgalaš Agnete Johnsen vuittii Norgga Melodi Grand Prix lávvordaga

Foto: Bøe, Torstein / NTB scanpix

– Munnje lea nu buorre oaidnit min nuoraid ja sin eallinmovtta ja sámivuođa. Árvidan ahte máŋgasat dán sálas geavahedje lávvordat eahkeda nugo mun čuovvumiin ja jienastemiin Unjárgga nieidda Agnete Johnsena vuitui Norgga Melodi Grand Prixas.

Keskitalo logai ahte muitá bures logi jagi áigi go vuosttaš geardde gulai ja oinnii Agnete juoigamin Finnmárkkoopmodaga vuođđudandoaluin.

– Dalle jo báittii dego násti. Sávan sutnje lihku loahppagilvvus Stockholmas ja buot eará nuorra sámi taleanttaide lihku boahtteáigái. Mii leat ain dás.

Aili Keskitalo

Aili Keskitalo Sámedikki sárdnestuolus odne

Foto: Liv Inger Somby/NRK