Vibeke Larsen válljejuvvui Sámedikki boahtte presideantan, ja Bargiidbellodaga Ronny Wilhelmsen ges šaddá várrepresideantan. Jienasteamis dorjo 22 samediggeáirasa Bargiidbellodaga evttohasaid ja 14 áirasa jienastedje vuostá.
Muđui oažžu Larsen dáid mielde Sámediggeráđđái Lars Filip Paulsen, Olgeš, Inger Eline Eriksen, Árja ja Mariann Wollman Magga, BB
Váttis dilli
Maŋŋil go Aili Keskitalo ikte dieđihii ahte son ja NSR loahpahit doaimmaideaset, mieđihii Sámedikki Bargiidbellodaga parlamentáralaš jođiheaddji, Vibeke Larsen, ahte lea leamašan váttis dilli Sámedikkis.
– Lea leamašan unohas dilli go šattaimet bušeahtakriisai, gos ii lean luohttámuš ráđi evttohussii. Ii leamaš dilli maid leat háliidan, muhto Bargiid Bellodat váldá ovddasvástádusa go ii leat eará molssaeaktu stivrejupmái, dadjá Larsen, gii dál lávke presideanta stullui.