NRK Meny
Normal

Presideanta duhtavaš go sii leat vuhtiiváldojuvvon

Sámediggepresideanta Vibeke Larsen lea duhtavaš go sin dárbbut viimmat leat váldon vuhtii.

Sametingspresident Vibeke Larsen i kofte i møtesal

Sámediggepresideanta illuda go sámi lohkanguovddáš šaddá nationála guovddážin.

Foto: Dan Robert Larsen / NRK

– Viimmat áddejit min dárbbu ja mii jáhkkit dál ahte dat lea mielde nannemin sámi mánáidgárddiid ja skuvllaid kvalitehta, dadjá sámediggepresideanta Vibeke Larsen.

Bargá viidát sámegiela geavahemiin

Sámi lohkanguovddáš lea resursaguovddáš erenoamážit oahpahusvuogádagaid várás mánáidgárdedási rájes alit oahpu rádjai. Sámi lohkanguovddáš bargá viidát álbmoga njálmmálaš ja čálalaš sámegiela geavahemiin.

Máhttodepartemeanta lea Stuorradiggedieđáhusas evttohan ahte Sámi lohkanguovddáš galgá oažžut seamma organisatoralaš rámmaid go dálá nationála guovddážat, ja oažžut seamma vuođđoruhtadeami go dat.

Rahčamušat ollašuvvan

– Máŋgga jagi rahčan lea dál dagahan ahte mii viimmat oažžut dakkár sámi gealboguovddáža mas leat seamma rámmaeavttut go dain logi eará nationála gealboguovddážiin, dadjá presideanta Vibeke Larsen.

Máhttodepartemeanta, Sámi allaskuvla ja Sámediggi galget lagas gulahallamis geahčadit ođđa guovddáža bargamušaid ja mo dat sáhttet harmoniserejuvvot nationála guovddážiiguin.

Mihttomearrin lea ahte rievdadusat čađahuvvojit ođđajagimánu 1. b. 2018 rájes.