Presideanta Arendalvahkkui

Norgga sámediggepresideanta searvá boahtte vahkku Arendalvahkkui, mii lea šaddan dehálaš deaivvadanbáikin politihkkariidda, servodatjođiheddjiide, ja politihkkalaš journalisttaide Norggas. Norgga sámediggepresideanta Aili Keskitalo searvá davviguovlodigáštallamii masa Stuoradiggi lea bovden. Fáddán lea "Movt buoremusat váldit atnui rikkes resurssaid davvin?". Arendalavahkku lea šaddan stuora ja dehálaš deaivvadanbáikin fápmoolbmuide ja politihkkii, ja dan eai sáhte politihkkarar, organisašuvnnat ja ođadoaimmahusat garvit, lohká Oslo Universitehta professor Eli Skogerbø, gii lea juste dutkan man dehálažžan dát doalut lea šaddan fápmoolbmuide Norggas. Diibmá serve 70 000 olbmo doaluide. Arendalvahkku lea Almedalsveckan doaluin oahppan, mat lea seamma sullásaš doalut Ruoŧabeale politihkkariidda ja earáide.