NRK Meny
Normal

Politiiját navdet su lobiheamit bivdán čáhcelottiid

Guovdageaidnolaš lohká iežas áibbas vigiheapmin, ja son imašta politiijáid bargovugiid.

Ollugat leat garrasit reageren go politiijat bidjet nu ollu návccaid ohcat lobihis loddejeddjiid Guovdageainnus Davvi-Norggas. Sátnejodiheaddji oaivvilda politiijaid geavahit válddiset boasttu láhkai.
___________

GEAHČA VIDEO: Nils Henrik Siri mielas lei unohas vásihit mo politiiját burge su viesu, vaikko iežas mielas lea áibbas vigiheapmi.

Klemet Erland Hætta

Sátnejođiheaddji Klemet Erland Hætta.

Foto: NRK

Ollugat atnet dan unohassan go politiijat bidjet nu olu návccaid ohcat lobihis loddejeddjiid Guovdageainnus Davvi-Norggas.

Sátnejođiheaddji oaivvilda politiijáid geavahit válddiset boasttu láhkái.

– Mu mielas lea unohas go politiijáveahka boahtá unna gilažii ja vázzet viesus vissui ja skoalkkuhit uksii ja jearahallet gean duo lea fanas. Olmmái soaitá leat leamaš fatnasiin bivdimin hávggaid. Danne leat mu mielas dárbbašmeahttun ja badjelmeriid bidjan návccaid dán áššái, lohká sátnejođiheaddji Klemet Erland Hætta.

Okta olmmoš áššáiduhttán

Buot Nils Henrik Siri gávcci bissu leat politiiját ikte duoguštan ja son lea dasa lassin áššáiduhttan go navdo leat lobiheamit bivdán čáhcelottiid.

Lobálaš bivdu ii álgge ovdal miessemánu 22. beaivve.

– Dáid jáhkáid, visot jáhkaid burge juohke lupma. Visot skohterbuvssaid válde ja jorgo bajás, visot ná jorgo, gehčče visot, dego livččen stuorimus bándihtta, muitala guovdageaidnolaš Nils Henrik Siri.

Aili Keskitalo

Sámediggepresideanta Aili Keskitalo (NSR).

Foto: Roger Manndal / NRK

Son ássán Mieronis, beannot miilla davabeale Guovdageainnu márkana. Doppe lei olles politiijáveahka ikte ohcamin lobihis loddejeaddjiid.

Ii sámediggepresiseanta ge ádde masa dát fápmogeavaheapmi livččii ávkin.

– Muđui árgabeaivvis mis ii leat dohkkálaš politiijafálaldat, muhto go stuorraservvodat galggašii ovttaláhkái váikkuhit dasa ahte boares árbevierru heaittihuvvo, de dat lea vuoruhuvvon. Mun reageren dasa ja mun ipmirdan ahte earát maid dan dahket, cuiggoda sámediggepresideanta Aili Keskitalo.

Pre Valved

Boazopolitiijáhoavda Per Valved.

Foto: NRK

Boazopolitiijáhoavda bealušta politijaákšuvnna, ja lohká diehtit ahte olbmot leat jo bivdigoahtán čáhcelottitiid, vaikko bivdu ii álgge ovdal bearjadaga.

– Dákkár doaimmaid lea dárbu bissehit, deattuha boazopoliijáhoavda Per Valved.

Dušše Guovdeageainnus

Guovdageaidnu lea dat áidna báiki Norggas gos giđđat lea lohpi bivdit čáhcelottiid, go dá lea dološ sámi árbevierru.

Muhto bivdu lea garrasit regulerejuvvon. Eai nu gallis beasa bivdit ja dat geat besset bivdit ožžot dušše moadde lotti bivdit.

– Jus njuolggadusaid geahččá ja heiveha daid buorebut min árbevieruide, de mun jáhkán maid ahte ii livčče dárbu nu garrasit dárkkistit, oaivvilda Keskitalo.

Lokkeender - andejakt i Kautokeino

Dákkár čohkkánlottiid sáhttá ihtá rájes oaidnigoahtit máŋgga sajis Guovdageainnus. Dalle álgá lobálaš giđđalodden.

Foto: Roger Manddal / NRK

Almmái gii lea áššáiduhtton lobihis loddemis, ii loga iežas diehtit maid politiiját ledje ohcamin.

– Dat eai dadjan maid sii ohcet, dan eai dadjan oppanassiige, muhto jerre mii dus doppe lea. Mun lohken doppe lea biepmu. Oažžubehtet geahččat, ja gehčče, mus lei biergu doppe ja, muhto lottit mus eai leat doppe gal. Mun in let báhčán lotti, ja galmmihanskábe seammalahkai, burge dan maid, čilge Siri ja bárdá oaivvis.