NRK Meny
Normal

Pokémon GO biras maiddái smávvabáikkiin

Olles máilmmis leat speallagoahtán Pokémon GO spealu, ja maiddái smávva báikkit leat fuomášan dán spealu.

Pokemon GO spillejeaddjit

Smávvabáikkiin lea maid speallanbiras.

Foto: Mailinn Anti Eira / NRK

Pokémon GO speallu almmuhuvvui Norggas suoidnemánu 16. beaivvi 2016is. Moatti beaivvis lea dát speallu šaddan hui bivnnuhin, ja maiddái Kárášjogas leat mánát, nuorat ja ollesolbmot speallagoahtán Pokémon GO spealu.

– Šattat veahá eambbo sosiála

Lisa Kajsa Vesterheim Skoglund

Lisa Kajsa Vesterheim Skoglund gulai spealu birra go lei Amerihkás ovddit mánus.

Foto: Privat

Lisa Kajsa Vesterheim Skoglund (20) muitala ahte lea app-speallu maid spealat mátketelefovnnain, ja ovdamearka dihte sáhttá gávdnat pokémonaid márkanis.

– Speallu lea somá go beasat veaháš váccašit márkanis, oaidnit eará olbmuid, ja šattat maiddái veahá eambbo sosiála. Olmmoš sáhttá darvánit spellui ja sáhttá dalle leat váttis heaitit speallamis, lohká Skoglund.

Skoglund čaimmiha vel go muitala ahte lea jo guktii maŋŋálaga vuojašan ihkku ohcan dihte pokemonaid.

(Ášši joatká gova vuolábealde)

Oappášguovttos

Oappášguovttos leaba easkaálgit spealus.

Foto: Privat

10-jahkásaš Kurt Somby láve earet eará oappástis Tanja Mortelmans (19) mielde márkanis ohcat pokémonaid. Somby speallagođii moatti beaivve maŋŋil go almmuhuvvui Norggas.

– Spealan danin go lea somá ja beasan vel lihkadit, lohká 10-jahkásaš.

Buktá cavgilemiid Facebook bokte

Guovdageainnu sátnejođiheaddji Johan Vasara buktá cavgilemiid Facebook-dieđus gos Guovdageainnus sáhttá gávdnat pokémonaid. Dieđus ávžžuha Vasara maid vuhtiiváldit johtolaga ja muđui leat várrogas.