NRK Meny
Normal

Lea go lohpi atnit playback SGPas?

Maŋŋel go Elin Kåven vuittii dán jagáš Sámi Grand Prix lávlungilvvu, čálle olbmot NRK Sámi Radio neahttasiidui Torgetii ahte Elin ii lávlon. Ahte sus lei playback. Muhto mii lea erohus playbackas, samplingas ja singbackas?

Dán áigge adno dávjá teknologija feara makkár hámis go artisttat leat lávddis. Muhtomin sii lávlot ja muhtomin eai. Muhtomin leat čuojaheaddjit lávddis, eará háviid eai, ja lihkká gullo musihkka.

Vuosttaš Luo-Mus Máilmmis mii sáddejuvvui cuoŋománu 11. beaivvi lei sáhka playbackas, samplingas ja singbackas. Mii lea mii?

Musihkkadahkki Magnus Vuolab
Foto: Anne Olli / NRK

Gula go musihkkabuvttadeaddji Magnus Vuolab čilge erohusaid:

MII LEA MII?

PLAYBACK - Dat lea go buot mii gullo lávddis lea ovddalgihtii báddejuvvon. Lávlu ii lávllo albma duođas, dušše lihkahallá baksamiid dego livččii lávlume. Ja čuojaheaddjit dahkáluddet ahte čuojahit.

SAMPLING - Sampling lea reaidu mii adno eanet ahte eanet dán áigge. Dat lea "bádden-rustet" man atná vaikko goas. Sáhttá omd. ovddalgihtii báddet lávluma ja vurket dan. Dasto deaddá syntersizeris dalle go dát báddejuvvon lávlla galgá gullot konsearttas. Sihke čuojanasaid ja lávluma sáhttá báddet čuojadettin konsearttas, ja de bidjat daid ain gullostit dakko gokko háliida.

SINGBACK - Singback lea go buot musihkka lea báddejuvvon ovddalgihtii, muhto ii lávlun. Dat mearkkaša ahte lávlu ii dárbbaš čuojaheddjiid lávdái, muhto bidjá musihka čuodjat dan bale ieš lávlu.

Manne samplejit?

Maiddái sámi musihkas lea dál samplinga "juohke sajes", ja musihkkár Svein Egil Oskal ii goit fuomáš maide heajos beliid dan samplemis. Dát han lea buorre reaidu ovttaskas artisttaide, geain ii leat joavku mii čuojaha. - Nu go omd. Slincraze, dadjá Oskal. - Slincraze "ferte" atnit samplingaid vai sus lea musihkka man mielde lávlu, go sus han ii leat joavku.

Sančuari vokalista Svein Egil Oskal
Foto: Lena Kristiansen

Gula maid Svein Egil Oskal oaivvilda samplinga birra;

MANNE SAMPLET?

Mii lea lohpi Sámi Grand Prixas?

Buvttadeaddji Christina Hætta dadjá ahte Sámi Grand Prixas lea guhká juo leamaš dábálaš atnit samplinga, ja ahte sii eai gal áiggo gieldit olbmuid atnimis ođđa tekonologija. Áidna mii gáibiduvvo, lea ahte váldo-lávlun ii leat báddejuvvon. Dat ferte lávlojuvvot "live", dadjá Hætta.

-Sii diktet samplinga adnot Sámi Grand Prixas danne go dat lea mielde deavdime lávlagiid jietnagova. Ja sis ii leat vel dássážii leamaš ruhta bálkáhit omd. korejeddjiid geat leat veahkkin deavdit jietnagova gilvaleddjiid lávlagiin, lohká Hætta.

Christina Hætta
Foto: Åse Pulk/NRK

Gula jearahallama Christina Hættain;

MII LEA LOHPI SGPas?