Per Heimly lea eret Snubba nammasaš báikkážis Evenášši suohkanis Nordlánddas. Ovdalis áiggis lea son eanaš govvidan beakkálmasaid ja eará dovddus olbmuid. Dál orru son rievdadan bargovuogis, go su govvačájáhusas Pavillionas Oslos čájehii son luonddugovaid. Muhtun govaid lei govven Snubbas, muhto maiddái Lofoahtas ja earáid lei ges govven Hurtigruvttos. Dáiguin govaiguin dáhttu Heimly čájehit seavdnjadasa, issorasvuođa ja noaiddástállama.
Per Heimly beaggigođii Norggas go vuvddii priváhta govaid iežas ustibis Ari Behn'as. Govat ledje govvejuvvon ovdal go Behn náitalii Norgga gonagasnieiddain Märta Louisiin. Dáinna lágiin suhttadii Heimly ollugiid. Ieš muitala ahte govaid almmuhemiin son gal ollugiid mielas šattai oalle heajos olmmožin, muhto ii son dal dasa veaje maidige. Lohká baicca váldán cuiggodemiid rávan.
Dál leat gollan muhtin jagit dien fearána rájes, ja dál son fas lea sáhttán bargagoahtit govvadáiddainnis buriin mielain. Heimly muitala alddis hálu váldit atnui sámi symbolihkka govvemis, go son dovddaha sámivuođa ja áinnas hálidivččii das atnit ávkki govvemis.