NRK Meny
Normal

Albma máŋggasuorggatdáiddár

Kárášjohkalaš Per H. Hætta máhtii feara maid. Son lei badjeolmmoš,  álbmotdáiddár, duojár, juoigi, dulka, politihkkár ja vuoktačuohppi.

Per H. Hætta
Foto: Vuorkágovva

Otne rahppui Sámiid Vuorká-Dávviriin Kárášjogas muitočájehusaš mas gudnejahttet máŋggasuorggatdáiddára Per H. Hætta. Dás oaidnit filmmaža maid NRK lea bádden dan beaivve go Hætta 55 jahkásažžan jámii jagis 1967.Čájáhusažis oaidnit maid muhtin ráje dáiddára govain ja dujiin.

Jurdda livččii doallat stuorát muitočájáhusa viđa jagi geažes. Dalle livččii Per H. Hætta deavdán 100 jagi.

Badjesogalaš

Per H. Hætta

Per H. Hætta

Per H. Hætta riegádii cuoŋománu 30. beaivvi giđđajohtima áigge Kárášjohtduoddaris. Son šattai bajás badjesámegándan ja čuovui boazodoalu jeđidettiin jahkásaččat mearragátti ja sisduoddariid gaskka.

Kárášjohkalaččat geavahedje Per H. Hætta dávjá dulkan ja čállin, ja dáid bargguid ovddas son hárve válddii mávssu. Sus ledje olu gielddalaš luohttámušdoaimmat, ovdamearkka dihtii gielddastivrraáirrasin ja skuvlastivrralahttun.

Duojár ja oahpaheaddji

Sámiid Vuorká-Dávviriid diehtojuohki Anders Henriksen
Foto: Dan Robert Larsen / NRK

Jagi 1941 rájes orui Per H. Hætta dušše Kárášjogas maŋŋágo Hášttás lei vázzán jahkebeale gávpeskuvlla. Das rájes son eanaš ealihii iežas duojárin. Gaskkohagaid son lei maid tiibmooahpaheaddjin Sámi Álbmotallaskuvllas Kárášjogas. Son doalai maid čoarve- ja dákteduodjekurssaid Kárášjoga ja Buolbmága Framhaldskuvllain.

- In hálit árvvoštallat man stuorra dáiddár Per H. Hætta lei, go munhan in leat dáiddadiehtti. Muhto dieđán ahte son lei dáiddar ja duojár mii elii áiggis John Savio ja Iver Jåks gaskkas. Dan lohká Sámiid Vuorká-Dávviriid diehtojuohkki Anders Henriksen.

Geahča ášši