Bueng bođii nubbin dán jagi juoiganoasis Sámi Grand Prixas beassášlávvordaga ja vuordá 10.000 norgga ruvdnosaš vuoittu.
– Dat lea hui unohas ja mun lean njulgestaga behtton. Mu mielas lea hui ártet go in leat vel ožžon vuoitoruđa guokte mánu mannjel gilvvu, lohka Per Bueng.
Son lea leamas mielde SGPas viđa geardde ja guovtte geardde beassan golmma čeahpimusaid searvái.
Gárggoluobbalaš lea váldán oktavuođa sámi musihkkafestiválain ja sii vástidedje teakstadieđu bokte ahte cuoŋománo 27.beaivvi galge máksit vuoittuid.
Dát ii leat vuosttaš geardde go Sámi Grand Prix vuoitit leat šaddan vuordit ovdal go vuoitu mákso. Diimmá vuoiti juoiganoasis maid šattai vuordit ovdal oaččui (olgguldas siidu) máksot. Ávvir áviisa almmuhii ovddemus dán birra.
Buot artisttat earet SGP vuoitit leat ožžon mávssu
Badjel bealli supmis mákso ođđajagimánus ja reasta mákso go buot bušeahtta- ja doaibmabáhpirat leat sáddejuvvon Sámediggái. Sámi musihkkafestivála oaččui 2018:is 1 484 000 ruvnno njuolggodoarjaga Sámedikkis.
Sámi musihkkafestivála buvttadeaddji Ol-Johan Gaup lohka ahte sii leat maŋŋonan máksimiin.
– Dat lea beare dat ahte mii leat vuordime daid loahpálaš doarjagiid ovdal sáhttit máksit, lohka son.
Gaup muitala ahte sii lávejit vuoruhit máksit artisttaide, ja buot artisttat earet Sámi Grand Prix artisttat leat ožžon mávssu dán háve.
– Mii eat diehttelasat árvvoštala olbmuid vuođul geasa máksit, muhto makkár máksimuš dat lea. Ja sávvamis nagodit cegget kapitála boahtteáiggis vái nagodit oktanagas máksit buot artisttaide, lohka Gaup.
Stifelsen Sámi musihkkafestivála lea Guovdageainnu suohkan, Beaivváš Sámi Nasjonalteahter ja Guovdageainnu sámiid searvi álggahan 2000:is. SMF váldomihttu lea ovddidit luođi, sámi musihka ja kultuvrra.
Isaac Elliot dagahii vuolláibáhcaga
Musihkkafestivála bušeahtain boahtá ovdan ahte 2015:is lei olu unnit doaibmasisaboahtu go 2016:is, muhto seammás lassánedje doaibmaolggosgolut. ja 2016:is rehketjagis lei musihkkafestiválas badjelaš 500 000 duháha ruvnno vuolláibáza.
Sámi musihkkafestivála ovddeš stivrajođiheaddji Ellen J.Sara Eira lohka ahte beakkán artistta Isac Elliot dagahii ahte šattai stuora vuolláibáza 2016:is.
– Mii šattaimet čuohppat ja lasihit sisaboađu bušeahtas (2017:is jour.mearka) vai njuolga fas. Ja dan mii nagodeimmet.