Beliin lea jagi 2004 rájes leamaš ovttasbargošiehtadus, ja ođđa šiehtadus lea fámus áigodagas 2016-2019.
– Šiehtadus galgá láhčit dili nu ahte mis lea máŋggabealat ja rikkis sámi kultureallin boahtteáiggis. Sámi dáidagis lea stuorra váikkuhus sámi servodaga ovdáneapmái, ja šiehtadus galggašii sámi kultureallimii addit staragaset ruđalaš birgejumi. Šiehtadus galgá ásahit njuolggadusaid, ovddasvástádusa ja geatnegasvuođaid sámi dáiddapolitihkkii ovddasguvlui, dadjá sámediggeráđđelahttu Henrik Olsen.
– Dáiddáršiehtadus lea áidnalunddot, ja addá min dáiddáriidda stuorra váikkuhanvejolašvuođa sámi girjjálašvuođa, musihka, govvadáidaga ja filmma boahtteáiggi ovdáneapmái, dadjá Olsen.
Sámedikki presideanta Aili Keskitalo vuolláičállá šiehtadusa Sámedikki bealis. Ada Jürgensen vuolláičállá šiehtadusa Sámi dáiddárráđi bealis.