Huitfeldt ovdanbuktá áigumušaid Árktalaš ráđi bargui

– Dat lea dehálaš seailluhit Árktalaš ráđi ovttasbarggu. Nu oaivvilda olgoriikaministtar Anniken Huitfeldt.

Ruošša politihkkárat eai beasa mielde ráđi doaimmaide maŋŋá go Ruošša fallehii Ukraina.

Miessemánu 11. beaivve jođihišgoahtá Norga ráđi. Otná ráđđečoahkkimis Romssas ovdanbuktá Huitfeldt Norgga vuoruhemiid sin jođihanáigái boahttevaš guokte jagi.

Ungára dohkkeha Suoma Nato-ohcamuša

Ungárlaš nationálačoahkkin dohkkeha Suoma Nato-ohcamuša

Dán mearrádusa ledje vuordán. Fidesz, ráđđehusbellodat, čujuhii jo ovdal jienasteami dan guvlui ahte bohtet dohkkehit Suoma ohcamuša.

Nato-riikkat Durka ja Ungára leat leamaš eahpesihkkarat dohkkehitgo Suoma ja Ruoŧa Nato-miellahttuvuođa. Muhto maŋŋágo Suoma presideanta, Sauli Niinistö guossuhii Durka moadde vahkku dás ovdal, de lohpidii riikka presideanta, Recep Tayyip Erdogan dohkkehit Suoma.

Dán maŋŋá, de dieđihii Ungára ahte sii maid dohkkehit Suoma miellahttuvuođa.

Guohtunroassu: Šaddet biebmat bohccuid vai eai ruoinna

Njealji Nuorta-Finnmárkku orohagain vásihit guohtunroasu, duođašta Stáhtahálddašeaddji ovttas gearggosvuođalávdegottiin. Boazodoallit šaddet fas biebmat bohccuid, vai eai ruoinna.

– Bohccuin lea vuoibmi dan láhkai ahte mii leat biebman ja leat nagodan nu ahte eai leat goarránan, muhto olu bargu leamaš. Mii leat dál jo addán birra jándoriid, muitala Sturin Áillu Jovnna, Spierttanjárgga orohaga boazodoalli. Dán rádjai leat mannan sullii 120 tonna suoidnespáppa.

Meteorologalaš instituhta ođđa grafihkkamodeallat duođaštit dan maid Jovnna lea vásihan dálvvi. Norgga nannámis lea Finnmárku mii lieggana eanemusat boahttevaš 100 jagi. Šaddá lieggaset ja eambbo njuoskkadat.

– Ii hal somá leat go jiekŋu guovlu. Bohccot galggašedje beassat guohtut ieža, ja dat čuohcá dieđusge maiddái dan go eai leat miesit šat olu ja dan birgejupmái, dadjá Jovnna.