– Bures fas Áilu.
Soai leaba ollen šaddat buori verddežat. Bearjadaga deaivvadeigga fas Gilevuonas Čorgašis; Tor Hushovd ja Áilu Utsi. Dalle ollii sihkkelastingilvu Arctic Race of Norway dohko.
Geassemánus dat Hushovd sihkkelasttii Deanu Šalddis Gilevutnii geahččalandihtii mátki maid gilvovuoddjit bearjadaga dulbme. Hushovd gii 2010 vuittii máilmmimeašttirgilvvu Australias ja Arctic Race of Norway fas 2013, bissánii Utsi mátkkoštanfitnodagas dalle ja beasai valjis borrat goikebierggu.
– Dan gal duođai liikojin, muitala Hushovd.
Bearjadaga guossohii Áilu Utsi fas suovasbierggu ovddeš sihkkelmeaštárii.
– Mu mielas lea somágo Thor liiko bohccobierggu. Ja somá lea maid go son ovdanbuktá dieđuid sápmelaččaid birra stuorra máilmmis, dadjá Utsi.
Thor Hushovd deattuha ahte son čevllohallá go beassá muitalit ahte davviguovlluin ásset sápmelaččat. Son lea maid oahppan njoarostit.
– Njoarosteamis son goittot ii leat meašttir, muhto lean baicca oalle meašttir borrat goikebierggu, Hushovd čilgesta.
LOGA DÁN MAID: