Vaikke su dearvvasvuođa dilli ii leaččage áibbas buorre, de bággehalai son datge diggái boahtit.
88-jahkásaš ovddeš generála ja presideanta šattai diggái vaikke su bealušteaddji geahččalit ákkastallat su menddo buohccin diggedoaimmain oassálastit.
Diggi šattai datge oalle oanehaš ja botkejuvvui go guovttis golmma duopmáris dohkkehedje bealušteaddji čuoččuhusa ahte váldoduopmár, Jeannette Valdez, galgá leat inhabiila go son lea masterbarggustis čállán Rios Montt birra.
Rios Montt, gii stivrii Guatemála 80-logu álggogeahčen, dubmehalai 2013:s 80 jahkái giddagassii álbmotgoddima ja soahterihkkosiid geažil, muhto duopmu fámohuhttui moadde vahku maŋŋil go gávnnahedje boasttuvuođaid áššemeannudeamis.
Rios Montt áššáskuhtto goddán 1771 mayaindiána dan vearrámus áigodagas dan 36 jagi bisti boargársoađis, go lei presideantan 1982-83.
Indiánaálbmogii čuozai erenomážit go sin sivahalle doarjut gerilja. Rios Montt stivrejupmi gottihii logi duháhiid mielde mayaindiánaid, veagalválddii ja dasa lassin dagahii báhtarussii logenár duháhiid dahje bággii sin paramiliteara joavkkuide mat galge gerilja vuostá soahtat.