Ovddeš bisma doallá sámegiel ipmilbálvalusa Bergenis

Norgga vuosttaš sámi bisma doallá sámegiel ipmilbálvalusa Sámi álbmotbeaivvi doaluid oktavuođas Bergena duopmogirkus.

Domkirken i Bergen - total

Bergen Duopmogirku

Foto: Christian Kråkenes / NRK

Sámi Álbotbeaivvi doaluid Bergenis lágida Norgga Sámiid Riikkasearvvi okta dain borraseamos servviin, Bergen Sámiid Searvi (BSS), mii vuođđuduvvui jagi 1969. BSS lea lágidan Sámi Álbmotbeaivvi doaluid moaddelot jagi. Eai leat nu galle Bergena ássit geat ovdal leat leamašan Sámi Álbmotbeaivvi doaluin. Dán jagi lea searvi geahččalan geasuhit eanet olbmuid. Dán jagi lágiduvvo sámegielat ipmilbálvalus Bergen duopmogirkus odne lávvardaga diibmu ovttas, gos ovddeš Davvi-Hålogalándda bisma, ja Norgga vuosttaš sámi bismma, Per Oskar Kjølaas, sárdnida.

Bergen – máŋggakultuvrralaš gávpot

Bergen Sátnejođiheaddji, Marte Mjøs Persen rámpui bearjadaga sáhkaváibmosis sáddagis ahte Bergen lea máŋggakultuvrrat gávpot, ja dajái ahte buot dát kultuvrraide gullevaš olbmot ellet bálddaga áibbas váttisvuođaid haga. Manin Bergen olbmot eai boađe doaluide, dasa gal ii lean vástádus ii Bergen Sámiid Searvvis iige sátnejođiheaddjis ge.

Mánát ohppet sámegiela ja kultuvrra birra

–Sámi Álbmotbeaivvi gal Bergen suohkan bures ávvuda, ja skuvllain ja mánáidgárddiin oahppit besset oahpásmuvvat ja oahppat sámi giela ja kultuvrra birra. Bergen suohkan maiddái levge sámileavggain Sámi Álbmotbeaivvi. Nu dajái Bergen Sátnejođiheaddji, Marte Mjøs Persen.

Dien gal ieš bessen vásihit ahte mánát gal dihtet goit veaháš sámi kultuvrra birra. Mun finádin Bergen gávpogis lávvardaga ovdalgaskabeaivvi ja jerren olbmuin mii sidjiide badjána jurdagiidda go mun daján, guovvamánu 6.beaivi. Muhttunat gal árvaledje áibbas eará, čuoigamat, spábbačiekčan jna. Muhto go dde jerren ahte leatgo gullán Sámi Álbmotbeaivvi birra, de gal jearraledje ahte odne bat lea Sámi Álbmotbeaivi. Mus dieđusge lei gákti badjelis go mun han lean ipmilbálvalussi čiŋádan, ja deiven muhttun bearášolbmuid.

De gal mánát dakkaviđe dadje: - Å – odne han lea Sámi Álbmotbeaivi, muhto dan gal váhnemat eai orron obage diehtimin.