NRK Meny
Normal

Oslo stádaráde Divtasvuodnaj

Sámedigge sihtá sáme boanndudagáv ja moattevuodav vuosedit gå la Oslo stádarádev Divtasvuodnaj gåhttjum. Ja Árranin ávvusi.

Árran julevsáme guovdásj ja mánnágárdde

Árrana mánájgárdde la aj prográmman gå Oslo stádaráde duorastagá guossáj boahtá.

Foto: Are Markku Tjihkkom / NRK

– Sámedikke ja Oslo suohkana gaskan la aktisasjsjiejhtadus, ja dan birra galggap de ságastit. Dajna lav de Oslo suohkanav Divtasvuodnaj gåhttjum julevsámegielajn ja kultuvrajn oahpásmuvátjit, ja mijá guovlov vuojnnet ja vásedit.

Dav javllá sámedikkeráde Lars Filip Paulsen guhti dán duorastagá ja bierjjedagá la Oslo suohkanav iejvvitjit Divtasvuonan.

Lars Filip Paulsen

Sámedikkeráde Lars Filip Paulsen ávvus gå Vuona oajvvestádav oadtju guossáj ietjas sijddasuohkanij.

Foto: Jan Roger Østby / Sámedigge

Boanndudahka

Paulsen tjielggi guokta tjåhkanime li jahkáj Sámedikke ja daj suohkanij gaskan gejna li aktisasjsjiehtadusá.

– Akta dajs tjåhkanimijs ásadalladuvvá suohkanijn gånnå l miján aktisasjsjeihtadus, ja nubbe tjåhkanibme l sáme guovlon. Oslo la stuorra suohkan gånnå aj julevsáme viessu, ja ájnas la Oslo, mij la oajvvestáda Vuonan, julevsáme gielajn ja kultuvrajn oahpásmuvvá.

– Sidáv aj dajna vuosedit Sámen la boanddudahka gielajs ja kultuvrajs.

Tone Tellevik Dahl

Oslo stádaráde Tone Tellevik Dahl la manoj nanna Divtasvuodnaj duorastagá ja bierjjedagá.

Foto: Fouad Acharki / NRK

Lågå: Nå skal Sametinget og Oslo kommune samarbeide bedre

Gájdosåhpadibme l ájnas

Duorastagá guossot Oslo suohkana bajássjaddam- ja máhttostádaráde Tone Tellevik Dahl julevsáme guovdátjav Árran gånnå galggá mánájgárddáj, museaj ja gájdospåhpadimijn oahpásmuvvat.

Árrana giellaguovdátja jådediddje Sven Egil Knutsen-Duolljá la ávon gå de bæssá giellaguovdátja dåjmaj birra giehttot ja vuosádallat Vuona oajvvestáda stádarádáj.

Sven Egil Knutsen Duolljá

Sven Egil Knutsen Duolljá ávvus gå Vuona oajvvestáda stádarádev oadtju guossáj.

Foto: Sander Andeersen / NRK

– Suohtas gå sihti mijáv guossidit juska ælla dahkamuhá siján. Giellaguovdásj aktan gájdosåhpadimijn ja mánájgárdde li riek ájnas vuosedittjat. Ja vájbi li sáme máná Oslon gudi de gájdosåhpadimev sihti, javla Knutsen Duolljá mådje.