Oslo-báhčimat: – Dá lea sivva manne Norggas lea dárbu ávvudit pride

– Ollugat leat mus jearran manne mis Norggas lea dárbu ávvudit pride. Dáppe han lea buot nu buorre ain juo báhpára alde. DÁT lea sivvan. Mii ávvudit pride vai mii galgat sáhttit eallit almmá balakeahttá báhččomis.

Nu čállá Noereh jođiheaddji Lars-Bjørnar Nøstan Knutsen sosiála mediain.

Nøstan Knutsen lei Oslos go Zaniar Matapour (43) lávvardatija báhčalii olgobáikkiid «Per på hjørnet» ja «London Pub» olggobealde Oslo gávpotguovddážis.

– Dát čuohcá munnje hui garrasit. Mun ledjen guovddážis go geavai. In nu guovddážis go earát, muhto mun ledjen doppe ja mun dollen roasmmohuvvan olbmuid birra ja maiddái sin birra geat eai roasmmuhuvvan, muitala Nøstan Knutsen NRK Sápmái.

Son ii leat sáhttán oađđit badjel 40 diibmui, muitala son. Muhto son ii háliit vel muitalit nu ollu vásáhusaidis birra.

Čalmmustandoalut

Jon Erik Isachsen (54) ja Kåre Arvid Hesvik (60) jámiiga báhčimiid geažil. 21 olbmo roasmmohuvve. Logis sis roasmmohuvve garrasit.

Oslos livčče dáid beivviid galgan lágiduvvot stuorra pride-doalut. Dát leat almmatge bissehuvvon báhčalemiid dihtii. Maiddái pride-ráidu.

– Mii ávvudit pride vai sáhttit eallit seammá dásis go earát. Mii ávvudit vai sáhttit eallit dorvvolaččat, čilge Nøstan Knutsen.

Guokte jándora maŋŋá Oslo báhčimiid áiggošedje lágidit čalmmustandoaluid Oslo Ráđđeviesu olggobealde.

Politiijat almmatge rávvejit olbmuid, ahte eai galgga oassálastit vuossárgga plánejuvvon doarjjadoaluide Ráđđeviesu olggobealde. Dan sii dahket čieguspolitiijaid dieđuid vuođul. NRK lea maid heaittihan plánejuvvon njuolggosáddaga.

Folk har kome saman for å visa støtte til dei som er råka etter skytinga i natt. I Oslo oppstod det ein spontan parade, og over heile landet har folk samla seg.

Solidaritetsmarkeringar etter skytinga i Oslo 31 bilder

Sámediggi doarju: – Vašši dagaha váralaš dáhpáhusaid

Sámediggepresideanta Silje Karine Muotka mielas lea ilgadis ja issoras dáhpáhus dat, mii geavai Oslos lávvardaga čuovganeapmái, ja su jurdagat mannet buohkaide geaidda dáhpáhus guoská.

– Vašši sáhttá buktit midjiide váralaš dáhpáhusaid, nu ahte mun ávžžuhan juohkehačča fertet bargat dihtomielalaččat eastadit vaši, deattuha Muotka.

Muotka muitala ahte lea dehálaš čalmmustahttit ja bidjat fuomášumi dasa go orru leamen dárbu. Ja sii Sámedikki bealis dorjot ekonomalaččat earret eará Garmere searvvi mii galgá loktet LHBTIQ+ dili servvodagas, sámi servvodaga ja sámi pride.

– Olles LHBTIQ+ servvodahkii dieđusge háliidan čielgasit dadjat ahte mii doarjut dan váimmolaččat, muitala Silje Karine.

Sámediggi lei levgen mannan vahkus go lei pride-vahku, sii levgejedje go ilgadis dáhpáhus geavai ja áigot maiddái levget go sámi pride lágiduvvo Ruoŧa bealde borgemánus.

Maŋimuš vahkuid leat Norggas ávvudan pride-doaluid, bonjuid ráhkisvuođa ja máŋggabealatvuođa. Oslo pride-doalut leat maid Norgga stuorámus ja deháleamos pride-doalut, gos čuđiid mielde eaktodáhtolaččat barget ovttasráđiid lágidit geasi fiidnámus deaivvadeami.

Lávvardaga čuovganeapmái gevve báhčaleamit olgobáikkiid «Per på hjørnet» ja «London Pub» olggobealde Oslo gávpotguovddážis. London Pub lea dovddus deaivvadanbáiki homofiillaide.