Orru vuolábealde uđasbáikki

– Mun árvidin ahte otne fierrá uđas, ja nu dat dagai, lohká leavvajohkalaš.

Snøras i Levajok

UĐAS LEAVVAJOGAS: Beaivečuovggas oinnii Leavvajohkalaš ahte ievttá uđas bisánii luohká duohkai.

Foto: Thoralf Henriksen / Privat

Sotnabeaivve eahket fierai uđas rastá E6š geainnu Leavvajogas, Deanu gielddas. Muohtaboltunbiila bázii belohahkii uđđasa vuollái ja moadde smávvabiilla maid darvánedje dasa. Ii oktage roasmmehuvvan uđđasii.

Leavvajohkalaš Thoralf Henriksen orru dastán vuolábealde uđasbáikki.

Thoralf Henriksen

ORRU UĐASBÁIKKIS: Leavvajohkalaš Thoralf Henriksen ii loga iežas ballán ievttá uđđasa dihte.

Foto: Piera Balto / NRK

Otne iđđes beaivvečuovggas finai son geahčadeame man stuora uđđasis dat duođaid lea sáhka.

– Dat lea várra sullii 200 mehtera govddu uđas mii lea fierran rastá luotta, oppalaččat lea birrasiid 500-600 mehtera govddu badjin várregilddas, dadjá Henriksen.

Son árvvoštallá muohttaga leat 2,5 mehtera gasu. Justta sin dálu bokte fierai uđas rastá geainnu, ja ii lean go luohká su dálu ja geainnu gaska.

Vávjjii uđđasa fierrat

Leavvajohkalaš ii daja iežas dovdan go uđas fierai, daid garra dálkkiid dihte mat ledje sotnabeaivve eahket. Dán dálvvi lea olu muohttán, ja Henriksen dadjá iežas measta vuordán goas uđas fierrá.

– Mii leat gal vávján ahte uđas boahtá fierrat, go lea luvven issorasat dan skálvvi dás bajábealde Rástegáissá gilggas. Muohta lea gasson issorasat maŋimuš vahkkus, čilge Henriksen.

Snøskred i Levajok

JOĐÁNAT LIHKKOHISVUOHTABÁIKÁI: Gádjunbálvalus doamai uđasbáikái, go dieđut coahkkigohte.

Foto: Oscar Henrik Biti Næss / NRK

Sotnabeaivvi ledje garra dálkkit miehtá davvi-Norgga, ja olu geainnut Finnmárkkus ledje gitta dán geažil. Dál leat biekkat ložžen, muhto máŋgga guovllus davvi-Norggas lea ain stuorra uđasvára.