Bearjadaga deaivvadedje Norgga davimus fylkkaid boanddaid searvvit ja boanddat Bargiidbellodaga nubbinjođiheddjiin Helga Pedersenain Girkonjarggas.
Vaikko Pedersen ii addán makkárge lohpádusaid deaivvadeamis de jáhkká Deanu boanda Per Andreas Mathisen ahte deaivvadeapmi lei ávkin sidjiide.
Dáhttot eanandoalloáirasa FeFo-stivrii
Vaikko Finnmárkku boanddaid searvvi jođiheaddji Fred Johnsen leige duhtavaš go Helga Pedersen bođii guldalit boanddaid, de čoahkkimis bođii ovdan ášši mii skurtnjagahtii Johnsena.
Boanddaid searvi lei dáhtton eanandoalloáirasa Finnmárkoopmodaga stivrii, nugo boazodoalus lea. Muhto dán eai leat ožžon ja dán birra šattaige sáhka deaivvadeamis bearjadaga. Helga Pedersen ii lohpidan boanddaide saji FeFo-stivrii, ja logaige ahte eai áiggo gieđahallat dán ášši ođđasit, muitala Fred Johnsen.