NRK Meny
Normal

Opmodat rikkis oanehis áiggis

Oanehis áiggis lea bearaš Finnmárkkus háhkan opmodagaid viidát Finnmárkkus, muhtumiid goasi nuvttá

Geir Wulff
Foto: Min Áigi

Dát, measta ovccičuođi-viessosaji stuora eatnamat, leat árbejuvvon dahje ostojuvvon oalle hálbái.

Moadde eananbihtá lea bearaš maid goasi nuvttá ožžon.Norgga lágaid mielde sáhttet earát maid dahkat dan seamma.

  GULDAL: Wulffa opmodagat

Sihkarastán viidát

- Mun lean dahkan dan maid earát maid áigá juo livčče galgan bargat, geahččalan sihkarastit daid rivttiid mat rievtti mielde gullet munnje, dadjá sohkadutki Geir Wulff, gean sápmelaččat máid dihtet Ságat-áviisa redaktoran.

Su bearaš dat oamasta 22 opmodaga akto dahje ovttas earáiguin gávcci suohkanis Finnmárkkus. Muhtun opmodagaid leat árben, oastán oalle hálbái dahje háhkan eaiggátvuođabáhpiriid goasi nuvttá:

Jus eai gáibit, de lea du

Diggelogahallanlága páragráfa 38a mielde sáhtát gulahit dahje almmolaččat čuoččuhit ahte don dat eaiggádušat dakkár opmodaga, masa ii gávdno báhper nalde eaiggát. Jos ii oktage daja dasa maidege, de šaddá opmodat du.

Ii Finnmárkoopmodaga opmodathoavda, Sverre Pavel, ge loga njuolggadusaid nu váttisin, muhto ii jáhke olbmot vearálaš vugiin goitge daid atnit.

Dušše golbma opmodaga dat lea Wulff-bearaš dieinnalágiin háhkan. Muhto sii leat lassin vel oastán ja árben opmodagaid viidát Finnmárkkus.