ON-njunuš dáhttu Norgga oljofoandda geassádit ámerihkkálaš oljobohccis

New York (NRK): Norgga stáhta oljofoanda bissu ain riidovuloš Dakota Access oljobohci oasseeaiggádin badjel logi miljárdasaš investeremiin.

Victoria Tauli-Corpuz

ON-njunuš Victoria Tauli-Corpuz cuiggoda Norgga stájta oljofoandda go ain doarju Dakota Access oljobohci.

Foto: Samuel Frode Grønmo / NRK

Norgga Oljofoanda hálddaša stáhta ovddas álbmoga ealáhatruđaid. Foanda lea dáiguin ruđaiguin investeren fitnodagaide mat doaimmahit Dakota Access oljobohci.

Árvu dáin investeremiin lea dál 11,6 miljárdda Norgga ruvnnu maŋŋá go diimmá dienas lei eambbogo 800 miljon ruvnnu.

Ovttastuvvon Nášuvnnaid (ON) áššedovdi ávžžuha foandda geassádit dies go rihkku guovllu olbmuid vuoigatvuođaid.

NORTH-DAKOTA-PIPELINE

Vuostálastimat Standing Rockas Davve-Dakotas leat dat stuorámus eamiálbmotvuostálastimat čuođi jahkái.

Foto: STEPHANIE KEITH / Reuters

– Standing Rock olbmuiguin ii leat albma láhkái ráđđádallojuvvon bohcci bidjamis sin čáhcegáldui. Iige sis leat jerrojuvvon, mihtetgo huksemii oppanassiige. Dát rihkku sin vuoigatvuođaid, cuiggoda Victoria Tauli-Corpuz NRK Sápmái.

Son lea Ovttastuvvon Nášuvnnaid sierraráportevra eamiálbmogiid vuoigatvuođain.

Bassieatnamat ja juhkančáhcegáldu

Duháhiid mielde olbmot leat Miehtá Ámerihká váibbakeahttá vuosttaldan Dakota Access oljobohcci huksema - sihke ovdal ja maŋŋá go Donald Trump loaiddastii presideantan.

Goitge lea Trump mearridastán ahte oljobohcci galgá njulgejuvvot Standing Rock lakota-álbmoga bassi eatnamiid čađa ja juhkančáhcegáldu rastá.

– Dasto leat sii oaidnán ahte báiki lea militariserejuvvon go sihkarvuođavávttat ja militearat leat dohko sáddejuvvon čorget leirra, lohká Tauli-Corpuz.

Standing Rock på FN-møte

ON bissovaš eamiálbmotforumas lei ikte sáhka Dakota Access oljobohcis, ja dát guokte nuorra almmáiolbmo leigga doppe čuovvumin ságastallama.

Foto: Samuel Frode Grønmo / NRK

– In leat vuollánan

Son ceggii jagi dás ovdal leirra Davvi Dakotai, gos miellačájeheaddjit vigge heađuštit ráhkadusmášiinnaid.

Dál lea leira čorgejuvvon, muhto son ii leat goitge vuollánan.

– Mii leat easkka vuostá čuoččastan. Mii joatkit gičču. Doppe ii golgga vel olju bohcceráigge. Mii joatkit rohkadallat. Min lihkadus lea máilmmiviidosaš dál ja mii joatkit siviila jeagutisvuođain, čilge LaDonna Brave Bull Allard.

LaDonna Brave Bull Allard

LaDonna Brave Bull Allard dat álggahii Standing Rock vuostálastimiid. Son ii loga iežas vel vuollánan.

Foto: Samuel Frode Grønmo / NRK

Masá buot Norgga ruhtaásahusat leat geassádan Dakota Access prošeavttas. Dušše stáhta oljofoanda lea báhcán dohko 11,6 miljárddain ruvnnuin.

– Jáhkán sii fertejit muhttit mearrádusa jus oljobohcci rihkku eamiálbmogiid vuoigatvuođaid ja nuoskkida sin birrasa. Oaivvildan ahte lea stuorra ágga ahte Stáhta penšuvdnafoanda ii galgga ruhtadit dákkár doaimmaid, oaivvilda Victoria Tauli-Corpuz.